कोरोना परीक्षणको दायरा बढाएर युद्धस्तरमा कार्य गर्न सरकारलाई कांग्रेसको अपिल
-
चैत २५, २०७६ काठमाडौं ।
नेपाली कांग्रेसको पदाधिकारी बैठकले स्वास्थ्य सामग्री खरिदमा अनियमितता भएको देखिएको भन्दै छानविन गर्न माग गरेको छ।
मंगलबार सभापति शेरबहादुर देउवाको निवास बुढानिलकण्ठमा बसेको बैठकले स्वास्थ्य सामग्री खरिदमा बजार मूल्यभन्दा बढी राज्यकोषको रकम निकासा गराएर गरिएको भ्रष्टाचार तथा अनियमिततामा संलग्नलाई पदमुक्त गर्न सरकारसँग माग गरेको हो।
‘स्वास्थ्य सामग्री खरिदमा बजार मूल्यभन्दा बढी राज्यकोषको रकम निकासा गराएर गरिएको भ्रष्टाचार र अनियमिततामा संलग्नहरुलाई पदमुक्त गर्न अपील गर्दै बैठकले अनिवार्य छानवीन र कार्वाहीको बिषयमा ढिलाइ नगर्न सम्बन्धित निकायलाई आग्रह गरेको छ,’ पार्टी प्रवक्ता विश्वप्रकाश शर्माले भने।
शर्माका अनुसार पदाधिकारी बैठकमा कोरोना जोखिम सामना गर्न सरकारले हालसम्म गरेका तयारीबारे समीक्षा गरिएको थियो।
‘समय पर्याप्त पाएर पनि तयारी नगरिनुलाई दुस्खद रूपमा लिँदै बैठकले संक्रमण दोस्रो चरणमा प्रवेश गरेको अवस्थालाई गम्भीरतापूर्वक लिएर परीक्षण दायरा बढाएर युद्धस्तरमा कार्य गर्न सरकारलाई अपिल गरेको छ,’ शर्माले भने।
बैठकले कोरोना संकटबाट नेपाल र नेपालीलाई जोगाउन सरकारलाई हरसंभव सघाउने निर्णय गरेको छ। कांग्रेसले स्वास्थ्यकर्मीको उच्च मानवीय भावना र समर्पणले कोरोनाविरूद्धको संघर्षमा सफलता मिल्ने विश्वाससमेत गरेको छ।
पार्टीका मुख्यसचिव कृष्णप्रसाद पौडेलले दिएको जानकारीअनुसार स्वास्थ्यकर्मीलाई पिपिईलगायत अत्यावश्यक सामाग्री सरकारले उपलब्ध गराउन नसकेकोमा चिन्ता प्रकट गरेको छ।
