कोरोनाका कारण बन्द रसुवागढी नाका सोमबारदेखी सञ्चालनमा ल्याउने
-
असार २१,२०७७ काठमाडौं ।
कोरोनाका कारण ६ महिनादेखि बन्द नेपाल(चीन रसुवागढी नाका सोमबारदेखि सञ्चालनमा आउने भएको छ । दुई देशबीचको व्यापार सुचारु गर्ने सुरक्षा मापदण्डमा समझदरी बनेपछि नाका खुल्ने निश्चित भएको रसुवागढी भन्सार कार्यालय प्रमुख पुण्यबिक्रम खड्काले बताए ।
सुरूवातमा हिमपात र पहिरोका कारण पुस १४ बाट नाका बन्द थियो । त्यसपछि कोरोनाको महामारीले प्रभावित भयो ।
‘सोमबार नेपाली समयअनुसार बिहान ८ बजेदेखि नाका सञ्चालनमा ल्याउन समझदारी बनेको भन्सार प्रमुख खड्काले बताए। सोमबार पहिलो चरणमा केही अघिदेखी नाकाको चीनतर्फ रोकिएका रेडिमेट गार्मेन्ट र स्याउहरु नेपाल भित्रिने उनले बताए ।
नाका सञ्चालन प्रोटोकलअनुसार दैनिक चार वटा चिनियाँ ट्रकले १२० टन सामाग्री दुई देशबीचको सीमा मितेरी पुलसम्म ल्याइदिने छ ।
नेपालतर्फ आयात हुने सामानको ढुवानी र लोड गर्न नेपालीहरु नै परिचालित हुने र त्यसकालागि १५ जना चालक र १५ जना लोडरी गरी ३० जना जनशक्ति चीनतर्फ पठाएको पनि भन्सार कार्यालयले जनाएको छ ।
चीनतर्फ पठाइएका सबैको कोरोना परिक्षण गरिएको र उनीहरुको पिसीआर नतिजा नेगेटिभ छ । चीन गएकाहरु चीनीयाँको सम्पर्कमा नरहने र होटल क्वरीन्टीनमा बसेर काम गर्ने सहमती भएको छ ।
मितेरी पुलसम्म ल्याइएको सामान पुनः ढुवानी गरेर नेपाली कन्टेनरले नेपालतर्फ ल्याईने भन्सार कार्यालयले जनाएको छ । व्यवसायीहरु चिनतर्फ जान नपाउने र रसुवागढीसम्म जानका लागि पनि रसुवा जिल्ला प्रशासनको पास अनिवार्य गरिएको छ ।
