अवैध मिर्गौला प्रत्यारोपणको आरोपमा भरतपुरबाट चार चिकित्सक पक्राउ
-
असार २७,२०७७ काठमाडौं ।
चितवनको कलेज अफ मेडिकल साइन्सेस (पुरानो मेडिकल कलेज) भरतपुरबाट चार चिकित्सक पक्राउ परेका छन् ।
अवैध रुपमा मिर्गौला प्रत्यारोपण गराएको आरोपमा प्रहरीले चार चिकित्सक र जिल्ला प्रशासन कार्यालय चितवनका कर्मचारीलाई पक्राउ गरेको हो ।
पक्राउ पर्नेमा अस्पतालको मिर्गौला रोग विभागका प्रमुख प्रा डा राकेश बर्मा, प्रा डा बालकृष्ण कालाखेती, डा किरण अधिकारी र डा सुप्रभात श्रेष्ठ छन् । डा सुभात श्रेष्ठ कलेजका सीईओ र मेडिकल काउन्सिलका सदस्य पनि हुन् ।
यस्तै जिल्ला प्रशासन कार्यालय चितवनका शाखा अधिकृत रामचन्द्र ढकाल र अधिवक्ता रमेश काफ्ले पनि पक्राउ परेका छन् ।
कलेजमा एक वर्षअगाडि ललितपुरका एक व्यक्तिको मिर्गौला प्रत्यारोपण गरिएको थियो । भान्जा नाता प्रमाणित गरेर ल्याइएका एक युवकले उनलाई मिर्गौला दिएका थिए । त्यसको अनुसन्धानका क्रममा प्रहरीको अपराध अनुसन्धान ब्यूरोले उनीहरुलाई पक्राउ गरेको हो ।
