कांग्रेसको निर्वाचन समितिमा महादेवप्रसाद यादव नियुक्ति

बैशाख ०८,२०७८

-आस्था न्यूज

बैशाख ८,२०७८ काठमाडौं ।
कांग्रेसले पार्टीको निर्वाचन समितिमा राष्ट्रिय सभाका पूर्व सदस्यसमेत रहेका वरिष्ठ कानुन व्यवसायी महादेवप्रसाद यादवलाई संयोजक नियुक्ति गर्ने निर्णय गरेको छ ।
 
पार्टी सभापति शेरबहादुर देउवाको बुढानिलकण्ठस्थित निवासमा बुधबार बिहान बसेको पदाधिकारी र पूर्व पदाधिकारी सम्मिलित बैठकले यादवलाई संयोजक तोक्ने निर्णय गरेको पार्टी उपसभापति विमलेन्द्र निधिले बताए ।
 
पार्टीको आसन्‍न महाधिवेशनको मुखमा निर्वाचन समितिका संयोजक राधेश्याम अधिकारीले राजीनामा दिएका थिए ।
 
पार्टीका संरचना समायोजनको कामलाई लिएर नेताहरुले विवाद झिकेपछि त्यसैमा असन्तुष्टि जनाउँदै राजीनामा दिएका हुन् । धनुषा निवासी यादव पूर्व महान्याधिवक्ता समेत हुन् ।