आमाका लागि अझै प्यारा छन् ओसामा बिन लादेन

श्रावण २१,२०७५

साउन २१, २०७५ एजेंसी

विश्वकै सबैभन्दा खतरनाक आतङ्ककारीका रुपमा परिचित ओसामा बिन लादेनकी आमाले २०११ मा उनको मृत्युपछि पहिलोपटक उनीबारे अन्तर्वार्ता दिएकी छन् । तर ७० वर्षीया आलिया घानेमले आफ्ना छोरा आतङ्ककारी समूह अलकायदाका प्रमुख भएपनि उनको सकारात्मक व्याख्या मात्र गरेकी हुन् ।

२००१ मा वल्र्ड ट्रेड सेन्टर हमलाका प्रमुख नेतृत्वकारी बिन लादेनलाई विश्वकै सबैभन्दा भयानक अपराधीका रुपमा चित्रण गरिन्छ किनकी उनी प्रत्यक्ष लडाईँमा सहभागी नभएपनि चलाखीपूर्वक षड्यन्त्र रचि आतङ्क फैलाउने काम गर्दथे । तर उनकी आमा आलियाले भने अझै आफ्ना छोराको राम्रो पक्ष मात्र देखेको बताउँछिन् र छोरा लादेनप्रतिको उनको माया पनि अझै कम नभएको सो अन्तर्वार्ताबाट प्रष्ट भएको हो । द गार्जियनसँगको उक्त अन्तर्वार्तामा उनले बिन लादेनलाई एकदमै सिधा र ज्ञानी बालकका रुपमा व्याख्या गरेकी छन् ।

यसरी पहिलोपटक साउदी अरबमा उनको घरबाटै अन्तर्वार्ता लिइएको हो । उनी बस्ने जेद्दा क्षेत्रमा उनलाई सबैले चिन्ने गरेका छन् । आमा आलियाका अनुसार बिन लादेन अब्दुललजिज युनिभर्सिटी जानु अघिसम्म अत्यन्तै राम्रो विद्यार्थी थिए जहाँ उनी अर्थशास्त्रको पढाइ पूरा गरिरहेका थिए । तर त्यहाँको वातावरणका कारण उनको व्यवहार र व्यक्तित्वमा अप्रत्यासित परिवर्तन आएको उनको भनाइ छ । उनले भनिन्, ‘त्यहाँ पुगेर ऊ अर्कै मान्छे भयो । त्यहाँका मान्छेले उसको मानसिकता नै फरक बनाइदिए ।’

यसैकारणले गर्दा २० वर्षको नहुँदै उनी नराम्रो संगतको शिकार भइ आपराधिक गतिविधिमा संलग्न हुन थालेको उनले बताएकी हुन् । त्यसैबेलादेखि उनी धर्म संप्रदायको समर्थक बनेको बताइन्छ । उनी भन्छिन्, ‘मैले उसलाई कैयौँ पटक खराब प्रवृत्तिका साथीहरुबाट छुट्याउन खोेजेँ तर हरेकचोटी म असफल हुनुपर्यो । त्यतिबेला हामी अत्यन्तै दुःखी भएका थियौँ ।’

उनको परिवारले बिन लादेनलाई यसअघि सन् १९९९ मा अफगानिस्तानमा देखेको थियो ।

बिन लादेनका पिताले आलियासँग डिभोर्स गरिसकेपछि ११ जनासँग विवाह गरेका थिए जसबाट उनका ५४ छोराछोरी छन् ।

आलियाका अन्य दुई छोराले बताए अनुसार अझै पनि उनी बिन लादेनबारे गलत खबरहरुलाई स्वीकार गर्न मान्दिनन् । आलियालाई उनका सबै राम्रा पक्षबारे मात्र थाहा भएकाले उनले बिन लादेनलाई सधैँ उनी सानो हुँदाको अवस्थासँग नै तुलना गर्ने गरेको बताइएको छ ।

आलियाका अनुसार खराब प्रभावका कारण उनी भयानक अवस्थामा पुगेका हुन् । र यसमा उनको परिवारको कुनै हात छैन ।

वास्तवमा यत्तिका वर्षसम्म बिन लादेनको विषयमा कुनै बयान दिन नमानेकी आलियाले ट्रेड सेन्टरको हमलामा परिवारको पनि भूमिका थियो भन्ने हल्लालाई गलत ठहर्याउन र सत्यको खुलासा गर्न सो अन्र्तवार्ताका लागि सहमत भएको बताएकी हुन् । छोराले आफूलाई धेरै माया गर्ने हुनाले नै कोसँग मिलेर के गरिरहेको छ भन्ने कहिल्यै नसुनाउने गरेको उनले भावुक हुँदै बताएकी हुन् । उनी जिहादी भएको खबरले अहिलेसम्म पनि उनको मनमा ठूलो धक्का पुग्ने गरेको उनी बताउँछिन् ।