लिस्नु कपको उपाधि जित्यो नवयुवाले
-
साउन २२ ,२०७५ बुटवल ।
नवयुवा खेलकुद तथा सांस्कृतिक परिवार ठुटिपिपल रुपन्देहीले १८ औं लिस्नु कप नकआउट फुटबल प्रतियोगिताको उपाधि जितेको छ ।
लिस्नुकपको १७ औं संस्करणमा नवयुवा उपविजेता बनेको थियो ।
पशुपति माविको मैदानमा सोमबार सम्पन्न फाइनल खेलमा साविक विजेता डिवाईसी सियारी लाई २-१ गोल अन्तरले हराउँदै नवयुवाले उपाधि जित्यो । नवयुवाको जितका लागि ६० औं मिनेटमा तिर्थ बस्नेतले गोल गरेर टिमलाई अग्रता दिलाएका थिए । तिर्थले विदेशी खेलाडी स्टेफनको प्रहार रिबाउन्स भएर फर्कंदा जाली चुमाएका थिए ।
यस्तै ६४ औं मिनेटमा रन्जित आलेले एक्लै बल अघि बढाएर टिमका लागि दोस्रो गोल गरेका थिए ।
डिवाईसीका तर्फबाट ७५ औं मिनेटमा राज पौडेलले डिएरियाबाट गोल फर्काएका थिए ।
लिस्नु युवा क्लबको आयोजनामा भएको प्रतियोगिताको जितसँगै नवयुवाले तीन लाख रुपैयाँ, उपविजेता डिवाईसीले एक लाख ५० हजार र सेमिफाइनलमा पुगेका दुई टिम पश्चिम क्षेत्रीय प्रहरी तालिम केन्द्र बुटवल र आयोजक लिस्नु युवा क्लबले २५÷२५ हजार नगद पुरस्कार प्राप्त गरे ।
