रोमामाथि रियल मड्रिडको जित
-
साउन २३, २०७५ एजेन्सी ।
रियल मड्रिडले अन्तर्राष्ट्रिय च्याम्पियन्स कप अन्तर्गत बुधबार बिहान भएको खेलमा रोमालाई हराएको छ।
नयाँ सिजनको तयारीमा रहेको युरोपियन च्याम्पियन रियल मड्रिडले इटालियन क्लब रोमालाई २–१ ले हराएको हो। रियलको जितमा मार्को एसेन्सिओ र ग्यारेथ बेलले गोल गरेका थिए। रोमाका लागि केविन स्ट्रोटम्यानले एक गोल फर्काए।
अमेरिकाको न्युजर्सीमा भएको खेलमा रियल मड्रिडले सुरूवाती १५ मिनेट भित्रै २–० को अग्रता लिएको थियो। खेलको दोस्रो मिनेटमै मार्कोले गोल गर्दै खेलमा अग्रता दिलाएका थिए।
बेलले १५ औं मिनेटमा गोल गर्दै अग्रता दोब्बर पारे। ८३औं मिनेटसम्म २–० ले पछाडि रहेको रोमाका लागि ८३ औं मिनेटमा केविनले गोल गर्दै खेलमा फर्कने कोशिश गरे।
तर त्यसपछि कुनै टिमबाट पनि गोल भएन र खेल रियलले २–१ ले आफ्नो पक्षमा पार्यो। एजेन्सी ।
