म्यानचेस्टर सिटीको न्युकासल युनाइटेडमाथि संघर्षपूर्ण जित
-
भदौ १७, २०७५ काठमाडौँ ।
साविकको विजेता म्यानचेस्टर सिटीले इंग्लिस प्रिमियर लिगमा न्युकासल युनाइटेडमाथि २–१ को संघर्षपूर्ण जित निकालेको छ ।
घरेलु मैदानमा भएको खेलमा सिटीको जितमा रहिम स्ट्रलिङ र केली वाल्करले एक–एक गोल गरे । न्युकासलका डीआन्द्रे एडलिनले सान्त्वना गोल फर्काए ।
खेलको आठौं मिनेटमा स्ट्रलिङले गोल गर्दै सिटीलाई अग्रता दिलाएका थिए । तर, खेलको ३० औं मिनेटमा न्युकासलका एडलिनले गोल गरेपछि पहिलो हाफ १– १ को बराबरीमा सकिएको थियो ।
खेलको ५२ औं मिनेटमा ३० यार्ड टाढाबाट वाल्करले उत्कृष्ट गोल गर्दै सिटीलाई २–१ को महत्वपूर्ण जित दिलाए ।
जितसंगै सिटीले ४ खेलबाट १० अंक जोडेको छ । सिटीको यो तेस्रो जित हो । लिगको तेस्रो स्थानमा रहेको सिटीले ४ खेलमा ३ जित र १ बराबरी खेलेको छ ।
