१२ अर्बकी मालिक्नी अभिनेत्री क्यामरन
-
१७ भदौ, २०७५ काठमाण्डौ l
हलिउड अभिनेत्री क्यामरन डियाजले ३० अगस्टमा ४६औँ जन्मदिन मनाइन् । उनको जन्म अमेरिकाको क्यालिफोर्नियामा भएको थियो । उनले १६ वर्षको उमेरदेखि फिल्मी करिअर सुरु गरेकी थिइन् । २१ वर्षको उमेरमा सन् १९९४ मा फिल्म ‘द मास्क’बाट हलिउडमा डेब्यु गरिन् । फिल्मले संसारभरबाट २२ सय ४० करोड कमाइ गर्यो । यसपछि उनी रातारात स्टार बनिन् ।
अहिले उनी एउटा फिल्म खेलेबापत एक अर्ब ५० लाखसम्म पारिश्रमिक लिने गर्छिन् । कुनै समय हलिउडमा सबैभन्दा धेरै कमाउने अभिनेत्रीको पंक्तिमा आफ्नो नाम आउने उनले बताएकी थिइन् । अब भने उनी फिल्मबाट सन्न्यास लिँदै छिन् ।
यसबारे उनको भनाइ थियो कि फिल्मका कारण उनले निजी जिन्दगी बिताउन समय पाएकी छैनन् । फिल्मका साथै उनी प्रेमसम्बन्धका कारण पनि चर्चामा आएकी थिइन् । उनले सन् २०१५ मा संगीतकार बेन्जी मेडनसँग क्यालियोफोर्नियामा बिहे गरिन् ।
क्यामरनसँग कुनै व्यापारीको भन्दा कम सम्पत्ति छैन । उनको साथमा करिब १२ सय ३० करोडबराबरको सम्पत्ति छ । सन् २०१० मा उनी १०० धनी महिलाको सूचीमा परेकी थिइन् ।
