कत्थक प्रशिक्षणमा आलिया भट्ट
-
२४ भदौ, २०७५ काठमाण्डौ l
बलिउड नायिका आलिया भट्ट एकपटक फेरि वरुण धवनसँग देखिने भएकी छिन् । करण जौहरको फिल्म ‘कलंक’मा उनी वरुणको जोडीका रूपमा देखिन लागेकी हुन् । यो फिल्ममा आलियासँग अभिनेत्री माधुरी दीक्षित पनि मुख्य भूमिकामा देखिने भएकी छिन् ।
भारतीय मिडियाका अनुसार फिल्ममा आलिया र माधुरीले एक क्लासिकल नृत्य सँगै गर्नुपर्नेछ । जसमा दुवै अभिनेत्री कत्थक गरिरहेका हुनेछन् । आलियाका लागि कत्थक नृत्य गर्न कठिन हुने अनुमान गरिएको छ ।
माधुरीका लागि त कत्थक गर्न मुस्किल हुने छैन । किनकि, उनी कत्थकमा प्रशिक्षणप्राप्त अभिनेत्री हुन् । तर, आलियालाई भने कत्थकबारे जानकारी छैन । त्यसैले आलिया यतिवेला कत्थक सिक्न कडा मिहिनेत गरिरहेको मिडियाले उल्लेख गरेका छन् ।
यतिवेला आलियाको ध्यान नै कत्थकका विभिन्न मुद्रा सिक्नमा केन्द्रित छ, किनकि उनलाई माधुरीको तालमा ताल मिलाउनुपर्ने चुनौती छ । आलियालाई पण्डित वीरजु महाराजसँग पनि कत्थक सिक्ने मौका प्राप्त हुनेछ ।
कलंक करण जौहरको मल्टीस्टारर फिल्म हो । जसमा आलिया, वरुण, माधुरीबाहेक सञ्जय दत्त, आदित्य राय कपुर र सोनाक्षी सिन्हाले समेत अभिनय गर्नेछन् । फिल्म अप्रिल २०१९ मा रिलिज हुनेछ।
