प्रेमलाई विषयवस्तु बनाएर लेखिएको देवराज भन्तनाको उपन्यास ‘मोनालिसा’ सार्वजनिक गरिएको छ । सर्वनाम थिएटरमा साहित्यकार राजन मुकारुङले उपन्यास विमोचन गरेका हुन् । कार्यक्रममा कवि तथा पत्रकार प्रकाश गुरागाईंले उपन्यासमाथि टिप्पणी गरेका थिए ।
आख्यानकार मुकारुङले लेखनका क्षेत्रमा नयाँ पुस्ता जन्मिने क्रम निरन्तर हुनुपर्ने र देवराज भन्तनालाई एक आशालाग्दो प्रतिभाका रूपमा लिन सकिने बताए । उनले विचारविना समाजलाई रूपान्तरण गर्न नसकिने पनि बताए । उपन्यास इन्डिगो इन्कले प्रकाशन गरेको हो ।
