लिभरपुलको सानदार जित
-
पुस १२, २०७५ एजेन्सी ।
इङ्लिश प्रिमियर लिग लिडर लिभरपुलले न्युक्यासल युनाइटेडमाथि सानदार जित निकाल्दै शीर्ष स्थान थप बलियो बनाएको छ । बुधबार राती घरेलु मैदानमा भएको खेलमा लिभरपुलले न्युक्यासललाई ४–० गोलले हरायो ।
अर्को खेलमा यसअघि लिभरपुललाई पछ्याई रहेको म्यानचेस्टर सिटी लेस्टर सिटीको अघरमा २–१ गोलले पराजित भयो ।
बक्सिङ डे को दिन घरेलु मैदानमा लिभरपुललाई जित दिलाउन डेजान लोभ्रेनले ११औं मिनेटमा गोल गरे । मोहमद सलाहले ४८औं मिनेटमा पेनाल्टी मार्फत दोस्रो गोल गरेका थिए । जेर्हदान साकिरीले ७९औं र फाविन्होले ८५औं मिनेटमा गोल गर्दै लिभरपुलको जित सहज बनाए ।
यसैगरी सिटीलाई लेस्टरको नमिठो झट्का लागेको छ । सुरुवाती अग्रता जोगाउन नसक्दा सिटी पराजित भएको थियो । सिटीले १४औं मिनेटमा बर्नान्डो सिल्भाको गोलको खाता खोलेको थियो । लेस्टरलाई जित दिलाउन मार्क अल्ब्राईटनले १९औं र रिकार्डो पेरिराले ८१औं मिनेटमा गोल गरेका थिए । ८९ औं मिनेटमा फाबियन डेल्फले रातो कार्ड पाएपछि सिटी १० खेलाडीमा समेटिएको थियो । यसहारले सिटीको उपाधि होडमा नराम्रो धक्का लागेको छ ।
न्युक्सायलसँगको जितसँगै शीर्ष टोली लिभरपुलले १९ खेलबाट ५१ अंक जोडेको छ । न्युक्यासल १७ अंक सहित १५औं स्थानमा छ । लिभरपुल दोस्रो स्थानमा रहेको टोट्टनहाम भन्दा ६ अंकले अगाडी छ । टोट्टनहामको समान खेलबाट ४५ अंक छ । तस्रो स्थानमा रहेको म्यानचेस्टर सिटीको ४४ अंक छ । २८ अंक बनाएको लेस्टर सातौं स्थानमा छ ।
एजेन्सी ।
