चितवनमा बन्न लागेको गौतमबुद्ध क्रिकेट रङ्गशालाको शिलान्यास भदौमा हुने
-
बैशाख, ८,२०७५ काठमाडौं ।
चितवनको रामपुरमा निर्माण हुन लागेको गौतमबुद्ध अन्तर्राष्ट्रिय क्रिकेट रङ्गशालाको शिलन्यास भदौमा गर्ने तयारीका साथ कामलाई तीव्रता दिइएको छ। शिलान्यास पूर्व गर्नुपर्ने प्रारम्भिक काम चरणबद्धरुपमा भइरहेका छन्।
रङ्गशाला निर्माण गर्दै गरेको सीताराम कट्टेल (धुर्मुस) र कुञ्जना घिमिरे (सुन्तली) फाउण्डेशनका अध्यक्ष सीताराम कट्टेलका अनुसार रङ्गशाला क्षेत्रलाई जस्ताले बार्ने काम, निर्माण गर्दा आवश्यक पर्ने कार्यालय निर्माण, कर्मचारी आवासगृह, गोदाम घर, सुरक्षाकर्मी घर लगायतका आवश्यक संरचना निर्माण भइसकेको छ। हालसम्म करीब रु ८० लाखको काम सम्पन्न भएको कट्टेलले बताए।
यसै सातादेखि खेलमैदानको भुइँको काम थालिने छ। अन्तर्राष्ट्रियस्तरको र पूर्वअभ्यासका लागि एउटारएउटा खेल मैदान निर्माण गरिने कट्टेलले बताए। गुरुयोजना तयार गरी नक्साङ्कनको काम तीव्र गतिमा अघि बढाइएको उनले बताए। वातावरणीय प्रभाव मूल्याङ्कनको काम पनि अघि बढाइएको छ।
क्रिकेट बाहेक अन्य खेलको विस्तृत अध्ययन प्रतिवेदन पनि अन्तिम चरणमा पुगेको छ भने क्रिकेटको प्रतिवेदन निर्माणको काम भइरहेको कट्टेलले बताए। कट्टेलका अनुसार आउँदो ३० वर्षपछि हुने प्रविधि अहिलेनै प्रयोग गरेर नक्साङ्कनको काम भइरहेको छ। यसका लागि नेपालीसँगै विदेशी विज्ञले पनि काम गरिरहेका छन्।
जेठ महीनासम्ममा ५० करोड रुपैयाँ सङ्कलन गरी आवश्यक सामग्री जम्मा गर्ने तयारी भइरहेको छ। हालसम्म ६ करोड रुपैयाँ सङ्कलन भएको फाउण्डेसनले जनाएको छ। कट्टेलले आर्थिक सहयोगका लागि देशभर अभियान शुरु हुने क्रममा रहेको बताउँदै कतिपय जिल्लामा सहयोग समिति बनेर रकम सङ्कलन हुन थालेको बताए।
सबै जिल्लामा समिति निर्माण गरी रङ्गशालाको अपनत्व लिने गरी आर्थिक सहयोग अभियानलाई तीव्रता दिइने उनले बताए। अर्थ सङ्कलनका लागि यही वैशाख १३ गते फाउण्डेसनको टोली दुबई जाँदै छ भने त्यस लगत्तै जापान, अष्ट्रेलिया, युरोप र अमेरिका जाने कार्यक्रम रहेको छ। फाउण्डेसनको खातामा पहिले जम्मा भएको दुई करोड नौ लाख रुपैयाँबाट कामको भुक्तानी भइरहेको उनले बताए।
बहुउपयोगी रङ्गशाला निर्माणमा तीन अर्ब रुपैयाँ लाग्ने धुर्मुस–सुन्तली फाउण्डेशनले जनाएको छ। अहिले बन्न लागेको रङ्गशालामा ३५ खेल खेलाउन सकिने छ। त्रिभुवन विश्वविद्यालयको नाममा रामपुरमा रहेको २० बिघा ६ कट्ठा जग्गामा रङ्गशाला निर्माण गर्न लागिएको हो। रङ्गशालालाई खेलकूद एकेडेमीका रूपमा विकास गर्ने तयारी गरिएको छ। रासस
