दुईतिहाइ देखाएर सरकारले अदालत र अख्तियारलाई तर्सायोः पौडेल
-
भदौ २४,२०७६ काठमाडौं ।
नेपाली कांग्रेसका वरिष्ठ नेता रामचन्द्र पौडेलले दुईतिहाइको भरमा वर्तमान सरकारले अदालत र अख्तियारलाई तर्साएर देशमा लुटतन्त्र मच्चाएको आरोप लगाएका छन् ।
कांग्रेसको राष्ट्रिय जागरण अभियानको दोस्रो चरणको कार्यक्रमको मंगलबार पोखरामा उद्घाटन गर्दै उनले अदालतले गरेका फैसलाहरु बाझिनु भनेको दुईतिहाइकै हस्तक्षेप भएको दाबी गरे ।
दुईतिहाइ देखाएर अदालतलाई तर्साउने, दुईतिहाइ देखाएर अख्तियारलाई तर्साउने काम भएको छ’-उनले भने ।
‘एनसेलबारे अदालतले गरेको निर्णयमा सरकार किन बोल्दैन?’-उनले प्रश्न गरे-‘सरकार किन ‘ठूला माछा’ समाउन सक्दैन?’
एनसेल र ‘वाइडबडी’मा भएको भ्रष्टाचारमा सरकारले ‘ठूला माछा’लाई कारबाही गर्न नसकेको भन्दै उनले सरकार पूर्णरुपमा असफल भएको टिप्पणी गरे ।
सत्तामा पुग्ने बेला सपना बाँडेको तर सरकारले सपनाअनुसारको काम नगरेको हुँदा जनतामा निराशा छाएको उनले उल्लेख गरे ।
उनले भने–‘सरकारले सामान्य काम पनि गर्न सक्दैन । देशमा डेंगीको महामारी छ । तर, नियन्त्रण गर्ने क्षमता सरकारमा छैन ।’
सरकारको काम–कारबाहीले संविधानको मर्मलाई आघात पुर्याउने काम भएको आरोपसमेत नेता पौडेलले लगाए ।
उनले बीपीले देखाएको बाटो अंगीकार गरेमात्र कांग्रेसको सपना पूरा हुने बताए ।
बीपीभन्दा ठूलो समाजवादी हुँ भन्ने कम्युनिस्टले देशको शासन गरे पनि उनीहरुले पक्षपातको शासन गरिरहेको उनको भनाइ थियो ।
कास्की क्षेत्र नम्बर-२ को उपनिर्वाचनमा आफ्नो पार्टीका उम्मेदवारलाई भोट हाल्न कांग्रेस नेता–कार्यकर्तालाई पौडेलले निर्देशन दिए ।
मंगलबारै पोखरा उपमहानगरपालिका-९ स्थित बीपी वाटिकामा नेता पौडेलले वृक्षरोपण गरे । सो अवसरमा विभिन्न जातका करिब १५० भन्दा बढी बिरुवा रोपिएको थियो ।
