जेठ २४,२०७४

-

जेठ २४ –

आयोजक इंग्ल्यान्ड लगातार दोस्रो जित निकाल्दै आइसीसी च्याम्पियन्स ट्रफी क्रिकेटको सेमिफाइनलमा प्रवेश गरेको छ ।

मंगलबार राति भएको खेलमा न्युजिल्याण्डलाई ८७ रनले हराउँदै इंग्ल्यान्डले एक खेल अगावै समूह ‘ए’ बाट अन्तिम चारमा स्थान पक्का गरेको हो । वेल्सको कार्डिफमा टस जितेर न्युजिल्याण्डले पहिले बलिङ गर्ने निर्णय गरेपछि ब्याटिङ गर्न पुगेको इंग्ल्यान्ड ३ बल अगावै ३ सय १० रनमा समेटिएको थियो ।

३ सय ११ रनको चुनौती पछ्याएको न्युजिल्याण्ड ४४ दशमलब ३ ओभरमा २ सय २३ रन मै समेटिन पुग्यो । इंग्ल्यान्डको जितमा जोए रुटले ६४, जोस बटलरले अविजित ६१ र एलेक्स हेल्सले ५६ रनको योगदान गरे । न्युजिल्याण्डका कोरी एन्डरसन र एडम मिल्नेले समान तीन तीन विकेट लिदा टिम साउथीले दुई विकेट लिए ।

जवाफी ब्याटिंग गर्न आएको न्युजिल्याण्डका लागि कप्तान केन विलियमसनले ८७ रनको योगदान दिएपनि टोलीलाई जित दिलाउन सकेनन् । अन्य खेलाडिमा रोस टेलरले ३९, मार्टीन गुप्टिलले २७ तथा जेम्स निशामले १८ रन जोडे । न्युजिल्याण्डलाई सस्तैमा समेट्न  इंग्ल्याण्डका लियम प्लुन्किट्टले चार तथा ज्याक वल र अदिल रशिदले समान दुई दुई विकेट लिएका थिए ।

जितसँगै अन्तिम चारमा पुगेको इंग्ल्याण्डको दुइ खेलबाट चार अंक छ । पराजित न्युजिल्याण्ड एक अंक जोडेर समूहको पुछारमा छ ।

प्रतियोगीता अन्र्तगत आज पाकिस्तान र साउथ अफ्रिकाबीच प्रतिस्पर्धा हुनेछ ।