नायिकाको एक्सन रहेको ‘तारेभीर' प्रदर्शनमा आउँदै

जेठ २४,२०७४

जेठ २४ –

नेपाली चलचित्रमा नायकहरुले एक्सन गरिरहेको समयमा ‘तारेभीर’मा भने नायिकाको एक्सनलाई दर्शकहरुले हेर्न पाउने भएका छन् । कलाकार प्रेम सुब्बाको डेब्यू निर्देशन रहेको नेपाली चलचित्र ‘तारेभीर’ असार २ बाट प्रदर्शनमा आउने भएको छ ।

समसामयिक आपराधिक घटनाक्रम र त्यसले समाजमा पारेको प्रभावलाई विषयवस्तु बनाईएको ‘तारेभीर’ नारी प्रधान चलचित्र हो जसमा नायिकाहरुको एक्सनलाई विशेष ध्यान दिईएको निर्देशक प्रेम सुब्बा बताउँछन् ।

‘तारेभीर’मा ‘नेपाल स्टार’की विजेता गायिका विष्णु चेम्जोङ, तेक्वान्दोका राष्ट्रिय खेलाडी नविन कार्की र नव नायिका रेखा फागोलाई सुब्बाले अभिनय गराएका छन् । चलचित्रको कथा अनुसार सुहाउँदो पात्र चयनका लागि मार्सलआर्ट खेलाडी नविनलाई लिईएको र नवनायिका रेखालाई करिब २ वर्ष मार्सलआर्टको तालिम दिएको उनी बताउँछन् ।

करिब ७० लाख लगानी भएको बताईएको तारेभीरको टिजर र गीतहरु सार्वजनिक भइसकेका छन् । तारेभीरको गीत ‘निलो निलो खुल्ला आकाश’ युट्युबमा दर्शकले खुबै मन पराएका छन् ।