नेपाली महिला भलिबल टिम सोझो तीन सेटमा शनिबार श्रीलंकालाई पराजित गर्दै १३ औं दक्षिण एसियाली खेलकुद (साग) को फाइनलमा प्रवेश गरेको छ । पहिलोपल्ट सागको फाइनलमा पुगेसगै नेपालले कम्तीमा रजतपदक पक्का गरेको छ ।
राष्ट्रिय खेलकुद परिषदको त्रिपुरेश्वरस्थित कभर्डहलमा भएको सेमिफाइनलमा नेपाली टिमले उत्कृष्ट प्रदर्शन गर्दै २५–१४, २५–१८, २५–२१ को जित हात पारेको हो।
नेपालले मंगलबार हुने फाइनलमा भारतको सामना गर्नेछ। डिफेन्डिङ च्याम्पियन भारतले सेमिफाइनलमा माल्दिभ्समाथि एकतर्फी जित रचेको थियो।
नेपालले सन् १९९८ मा काठमाडौंमा भएको आठौं संस्करण र तीन वर्षअघि गुवहाटी–सिलोङमा सम्पन्न १२ औं सागमा कांस्यपदक जितेको थियो।
यसपाली फाइनल प्रवेश गरेसँगै नेपालले कम्तीमा रजतपदक पक्का गर्दै हालसम्मकै सबभन्दा ठूलो उपलब्धि निश्चित गरेको छ ।
