माघ २२ गतेदेखि अन्तर-विद्यालय फुटसल प्रतियोगिता हुने
-
माघ २०,२०७६ काठमाडौं ।
लुम्बिनी एकेडेमीको मुख्य प्रायोजन तथा निजी तथा आवासीय विद्यालय संगठन काठमाडौं (प्याब्सक) को आयोजनामा यही माघ २२, २३ र २४ गते लुम्बिनी फुट्सल ग्राउण्ड चुच्चेपाटीमा अन्तर-विद्यालय फुटसल प्रतियोगिता हुने भएको छ ।
प्याब्सकले सोमबार रिपोर्टर्स क्लब नेपालमा पत्रकार सम्मेलन गरी ‘विकास, अनुशासन र गतिशिलता खेलाडीको पहिचान’, ‘राष्ट्रको लागि खेलकुद, स्वास्थ्यको लागि खेलकुद’ भन्ने मूल नाराका साथ प्रतियोगिता गर्न लागेको जानकारी दिएको हो ।
प्रतियोगितामा काठमाडौं उपत्यकाका ६४ वटा विद्यालयहरुले भाग लिने प्याब्सकका अध्यक्ष गेन्द्र लामाले जानकारी दिए ।
कार्यक्रममा प्याब्सकका अध्यक्ष लामाले विद्यार्थीहरुमा रहेका अन्तरनिहित प्रतिभालाई उजार गर्नु आफूहरुको उद्देश्य रहेको सुनाए ।
प्याब्सकका महासचिव राजन श्रेष्ठले प्याब्सकले गर्दै आएका विभिन्न गतिविधिको बारेमा प्रकाश पारेका थिए । उनले आफूहरुले छात्रमात्रै नभएर छात्राहरुलाई पनि खेलकुदको क्षेत्रमा अब्बल बनाउने उद्देश्यका साथ काम गर्दैै आएको सुनाए ।
