कोरोना संक्रमणबाट वुहान अस्पतालका निर्देशक लिउ झिमिङको पनि मृत्यु

फाल्गुण ०६,२०७६

-

फागुन ६,२०७६ काठमाडौं
कोरोना भाइरसबाट सबैभन्दा धेरै प्रभावित चीनको वुहान शहरमा रहेको अस्पतालका निर्देशक आफैं महामारीको शिकार भएका छन् ।
 
चीनको सरकारी टेलिभिजनका अनुसार वुहानको वुचाङ अस्पतालका निर्देशक लिउ झिमिङको मृत्यु भएको हो । 
 
उनको स्थानीय समयअनुसार मंगलबार साढे १० बजे कोरोना भाइरसको संक्रमणबाट मृत्यु भएको हो ।
 
उनको मृत्युको खबर सार्वजनिक हुनुअगावै चीनका सामाजिक सञ्जालमा उनको अवस्थालाई लिएर हल्लाखल्ला फैलिएको थियो । वुहान शहर रहेको हुबेई प्रान्तमा स्वास्थ्य विभाग अन्तर्गत सत्तारुढ कम्युनिस्ट पार्टीको प्रोपागाण्डा विभागले सोमबार अबेर नै लिउको मृत्यु भइसकेको जनाएको थियो ।
 
त्यसलगत्तै सार्वजनिक अर्को सूचनामा लिउको परिवारका अनुसार उनी जीवितै रहेको र चिकित्सकहरुले उनको उपचार गर्न सक्दो प्रयास गरिरहेको उल्लेख गरिएको थियो ।
 
चिनियाँ सञ्चारमाध्यमले आधिकारिक रुपमा उनको मंगलबार बिहान मात्रै मृत्यु भएको खुलासा गरेका हुन् ।
 
यसअघि कोरोना भाइरसबारे सर्वप्रथम जानकारी दिने नेत्ररोग विशेषज्ञ डा. ली वेनलियाङको यही महिनाको शुरुमा कोरोना भाइरसकै कारण मृत्यु भएपछि आक्रोशसहित लाखौं मानिसले श्रद्धाञ्जली व्यक्त गरेका थिए ।
 
चीनमा हालसम्म कोरोनाभाइरसका कारण मृत्यु हुनेको सङ्ख्या १८ सय नाघिसकेको छ भने अरु हजारौं मानिस यसबाट संक्रमित छन् । एजेन्सी