माइभ्याली गोल्डकपको उपाधि मछिन्द्र क्लबले जितेको छ । योसहित मच्छिन्द्रले यस सिजनमा तीन वटा उपाधि जितिसकेको छ । लिग च्याम्पियन मच्छिन्द्रले यसअघि सताक्षी गोल्डकपको उपाधि जितेको थियो ।
इलामको टुँडिखेलमा भएको फाइनलमा मच्छिन्द्रले आयोजक माइभ्याली क्लबलाई १-० गोल अन्तरले पराजित गरेको हो । खेलको पहिलो हाफ गोलरहित बराबरी भएको थियो ।
खेलको १२ औं मिनेटमा माइभ्यालीका कप्तान छिरिङ गुरुङले गोलको राम्रो अवसर पाएपनि सदुपयोग गर्न सकेनन् । दोस्रो हाफको इन्जुरी समयमा भने मछिन्द्रले अग्रता लिएको थियो । क्लबका लागि विदेशी खेलाडीले गोल गरेका हुन् । मछिन्द्रले माइभ्याली गोल्डकपको उपाधि पहिलो पटक जितेको हो ।
उपाधिसँगै मछिन्द्रले ८ लाख रुपैयाँ प्राप्त गरेको छ भने उपविजेता आयोजकले ५ लाख रुपैयाँमा चित्त बुझाएको छ ।
