एनफिल्डमा आठ गोलको थ्रिलरमा चेल्सीलाई हराउँदै लिभरपुलले ३० वर्षपछि लिग उपाधि जितेको खुसियाली मनाएको छ । बुधबार राति भएको खेलमा लिभरपुल ५-३ गोलअन्तरले विजयी बनेको हो ।
खेलमा नाबी किएटाले लिभरपुललाई अग्रता दिलाएका थिए । त्यसपछि ट्रेन्ट अलेक्सान्डर आर्नोल्ड र जिनी विज्नाल्डमले लिभरपुलको अग्रता फराकिलो बनाए । पहिलो हाफको इन्जुरी समयमा ओलिभर जिरुले एक गोल फर्काए ।
तर, दोस्रो हाफको सुरुवातमा नै घरेलु मैदानमा गोलको खडेरीको अन्त्य गर्दै रोबर्टो फर्मिन्होले पुनः लिभरपुललाई तीन गोलको अग्रता दिलाए । त्यसपछि ट्यामी अब्राहम र क्रिस्टियन पुलिसिचले गोल गर्दै चेल्सीलाई खेलमा फर्काउने आशा दिलाए । तर, खेलको ८४ औँ मिनेटमा एलेक्स ओक्सालेड च्याम्बरलिनले गोल गर्दै चेल्सीको पुनरागमनको आशा अन्त्य गरिदिए ।
