कोरोनाका खास ३ लक्षणः खोकी, ज्वरो, गन्ध तथा स्वाद थाहा नपाउनु
-
भदौ ५, २०७७ काठमाडौं ।
ब्रिटेनको नेसनल हेल्थ सर्भिसले कोरोना भाइरसको संक्रमणका खास तीन लक्षण औंल्याएको छ। जुन लक्षण देखिनेबित्तिकै सावधानी अपनाएर तुरुन्त चिकित्सकको सल्लाह लिनुपर्नेछ।
यस्ता छन् ३ लक्षणः
लगातार खोकीः कोरोना संक्रमणको एउटा प्रमुख लक्षण लगातार खोकी लाग्नु हो। एक घण्टा वा यसभन्दा बढी समय खोकी लाग्न सक्छ। २४ घण्टाभित्र यस्तो कम्तीमा तीनपटक हुन सक्छ। लगातार खोकी लागिरह्यो भन्ने कोरोना संक्रमणको शंका गर्नुपर्छ।
ज्वरोः उच्च ज्वरो अर्थात् शरीरको तापक्रम १३६-३७ डिग्री सेल्सियसभन्दा बढी आएमा।
गन्ध तथा स्वाद थाहा नपाउनेः गन्ध तथा स्वाद थाहा पाउन छाडियो भने पनि त्यो कोरोना संक्रमणको लक्षण हुन सक्छ।
विशेषज्ञका अनुसार कसैमा यीमध्ये कुनै लक्षण देखापरेमा उसले घरमा अलग्गै (आइसोलेसन) मा बस्न थाल्नुपर्छ। यसो गर्दा अर्को व्यक्तिमा संक्रमण सर्न पाउँदैन।
अमेरिकाको सेन्टर्स फर डिजिज कन्ट्रोल एन्ड प्रिभेन्सन (सीडीसी) का अनुसार चिसो लाग्ने, शरीर काँपेको महसुस हुने, मांसपेशी दुख्ने तथा घाँटीमा खसखस लाग्नु पनि कोरोना संक्रमणका संकेत हुन्।
कोरोना भाइरसको संक्रमण भएको औसतमा ५ दिनसम्ममा लक्षण देखिन्छन् भने कतिपयलाई योभन्दा बढी समय पनि लाग्न सक्छ। विश्व स्वास्थ्य संगठन (डब्ल्यूएचओ) का अनुसार भाइरस शरीरमा प्रवेश गरेको १४ दिनसम्ममा लक्षण देखापर्न सक्छन्।
कस्तो अवस्थामा अस्पताल भर्ना आवश्यक पर्छः
कोरोना संक्रमण भएका धेरैजसोलाई आराम गर्दा र पारासिटामोलजस्ता ज्वरो तथा दुखाइ कम गर्ने औषधि खाँदा ठीक हुन्छ।
तर जब सास लिन अप्ठेरो हुन थाल्छ, तब अवस्था जटिल बन्छ। त्यस्तो अवस्थामा भने अस्पताल भर्ना हुनुपर्छ। संक्रमणको अवस्था कस्तो छ, बिरामीलाई अक्सिजन वा भेन्टिलेटर आवश्यक छ छैन भन्ने कुरा विशेषज्ञले सम्बन्धित व्यक्तिको फोक्सो जाँच गरेर निर्धारण गर्छन्। बीबीसी
