बंगलादेशले अस्ट्रेलियालाई तेस्रो खेलमा शुक्रबार १० रनले पराजित गर्दै ट्वान्टी-२० सिरिज ३-० ले जितेको छ । शक्तिशाली प्रतिद्वन्द्वीमाथि बंगलादेशको यो लगातार तेस्रो जित हो । बंगलादेशले यसअघि अस्ट्रेलियाविरुद्ध कुनै पनि फर्म्याटमा सिरिज जितेको थिएन ।
पहिले ब्याटिङ गरेको बंगलादेशले नौ विकेटमा १ सय २७ रन बनाएको थियो । पाहुना टिमका लागि डेब्यु गरिरहेका नथान एलिसले ह्याट्रिक गरे र यसक्रममा आफ्नो पहिलो खेलमै लगातार तीन विकेट लिने पहिलो बलर पनि बने ।
जवाफमा अस्ट्रेलियाले चार विकेटमा १ सय १७ रन मात्र बनाउन सक्यो । उसका लागि मिचेल मार्सले ५१ रन बनाए पनि यो हार टार्नका लागि पर्याप्त रहेन ।
