‘युरेनियम’ बेच्ने भनेर ठग्न खोज्ने ७ जना पक्राउ

आश्विन ३०,२०७९



असोज ३०, २०७९ काठमाडौं ।
‘युरेनियम’ बेच्ने भनेर ठग्न खोजेको आरोपमा प्रहरीले ७ जनालाई पक्राउ गरेको छ । शुक्रवार उपत्यका अपराध अनुसन्धान कार्यालयबाट खटिएको टोलीले काठमाडौंको नयाँ बसपार्कबाट ७ जनालाई पक्राउ गरेको एकजना प्रहरी अधिकृतले रातोपाटीलाई बताए ।
 
पक्राउ पर्नेमा डोल्पा ठुलो भेरी घर भएर सानोथिमी बस्ने शंकर शाही, नुवाकोट किस्पाङ घर भएका ३२ वर्षीय दोर्जे तामाङ, मोरङ कानेपोखरी घर भएका ३६ वर्षीय दिपेन्द्र ढकाल, नुवाकोट म्यागम घर भएका ४१ वर्षीय मंगलसिंह तामाङ र  धादिङ बेत्रावती घर भएका ३२ वर्षीय रमित घले छन् । दोलखा भिमेश्वर घर भएका ५३ वर्षीय यादव सिलवाल र झापाको मेचिनगर घर भएका ५४ वर्षका सून्दर थापा पनि पक्राउ परेका छन् ।
 
प्रहरीले आरोपीहरुको साथबाट डेढ किलो फस्फोरस जस्तो देखिने पदार्थ बरामद गरेको छ । सो पदार्थ परिक्षणका लागि खानी तथा भुगर्भ विभागमा पठाइएको उपत्यका अपराध अनुसन्धान कार्यालयले जनाएको छ । अनुसन्धान कार्यालयले आारोपीहरुलाई थप अनुसन्धानका लागि प्रहरी वृत महाराजगञ्जमा पठाएको छ ।