भारतलाई हराउदै अष्ट्रेलिया आईसीसी विश्व टेस्ट च्याम्पियनसीपको फाइनलमा
-आस्था न्यूज
फागुन १९, २०७९ काठमाडौ ।
घरेलु टोली भारतलाई तेस्रो टेस्टमा पराजित गरि अष्ट्रेलिया आईसीसी विश्व टेस्ट च्याम्पियनसीपको फाइनलमा प्रवेश गरेको छ ।
अष्ट्रेलियाले घरेलु टोलीलाई ९ विकेटले पराजित गरेको हो । टेस्ट च्याम्पियनसिपको फाइनल खेल इंग्ल्याण्डमा जुनमा आयोजना हुँदैछ ।
इन्दोरमा भएको खेलमा भारतले दिएको ७६ रनको लक्ष्य पाहुना टोलीले १ विकेट गुमाएर पूरा गर्यो ।
पाहुना टोलीका लागि ओपनर ट्राभिस हेडले अपराजित रहँदै ४९ तथा मार्नुस लाबुस्चानेले अविजित रहँदै २८ रन बनाए।
घरेलु टोलीका लागि रविचन्द्रन आश्विनले १ विकेट लिए ।
त्यसअघि पहिलो पारीमा ८८ रनले पछि भारतले दोस्रो पारी १ सय ६३ रन बनाएको थियो ।
घरेलु टोलीका लागि चेतेश्वर पुजाराले ५९ रनको अर्धशतकीय ईनिङ खेले । श्रेयस अय्यरले २६ रन बनाउँदा रविचन्द्रन आश्विनले १६ रन बनाए ।
अक्षर पटेल १५ रनमा अविजित रहँदा विराट कोहली १३ रनमा आउट भए ।
भ्रमणकारी टोलीका लागि नाथन लायनले २३ ओभर ३ बलमा ६४ रन खर्चिएर ८ विकेट लिए ।
त्यसअघि भारतको इन्दोरमा बिहिबारबाट सुरु तेस्रो टेस्टमा अष्ट्रेलियाविरुद्ध घरेलु टोलीले टस जितेर पहिले ब्याटिङ गरेको थियो ।
