युरोकप छनोटमा फ्रान्सले नेदरल्यान्ड्सलाई हरायो
-आस्था न्यूज
चैत ११, २०७९ काठमाडौं ।
केलियन एमबाप्पेको कप्तानीमा फ्रान्सले युरोकप छनोटमा जित निकालेको छ । शुक्रबार राति भएको खेलमा फ्रान्सले नेदरल्यान्ड्सलाई ४-० गोल अन्तरले हराएको हो ।
फ्रान्सको जितमा एमबाप्पेले दुई गोल गरे । एन्टोनी ग्रीजम्यान र डायोट उपामेकानोले एक एक गोल गरे । खेलको दोस्रो मिनेटमा ग्रीजम्यानले गोल गर्दा फ्रान्सले सुरुआती अग्रता बनायो ।
आठौं मिनेटमा डायोटले गोल गर्दै फ्रान्सलाई २-० को अग्रता दिलाए । खेलको २१ औं मिनेटमा एमबाप्पेले गोल गरेपछि पहिलो हाफमा फ्रान्स ३-० ले अघि रह्यो ।
त्यसपछि खेलको ८८ औं मिनेटमा एमबाप्पेले व्यक्तिगत दोस्रो गोल गर्दै फ्रान्सलाई ४-० को जित दिलाए । जितसँगै फ्रान्सले पहिलो खेलमा ३ अंक जोडेको छ । फ्रान्स समूह बी को शीर्ष स्थानमा रहेको छ ।
अंक विहीन नेदरल्यान्ड्स पुछारमा रहेको छ ।
