इंग्लिस प्रिमियर लिग फुटबलमा लिभरपुलको जित
-आस्था न्यूज
वैशाख १०, २०८० काठमाडौं ।
इंग्लिस प्रिमियर लिग फुटबलमा लिभरपुलले जित निकालेको छ । शनिबार राति भएको खेलमा लिभरपुलले नटिङघम फरेस्टलाई ३-२ गोल अन्तरले हराएको हो ।
लिभरपुलको जितमा डिएगो जोटाले दुई गोल गरे । मोहमद सलाहको नाममा एक गोल रह्यो । फरेस्टका निको विलियम्स र मोर्गन गिब्स व्हाइटले एक एक गोल फर्काए ।
खेलको ४७ औं मिनेटमा जोटाले गोल गर्दै लिभरपुललाई सुरुआती अग्रता दिलाएका थिए । ५१ औं मिनेटमा विलियम्सले गोल गर्दै फरेस्टलाई १-१ गोलको बराबरीमा ल्याए ।
खेलको ५५ औं मिनेटमा जोटाले व्यक्तिगत दोस्रो गोल गर्दा लिभरपुल २-१ ले अघि रह्यो । ६७ औं मिनेटमा मोर्गनले गोल गर्दै फरेस्टलाई २-२ गोलको बराबरीमा ल्याए ।
त्यसपछि खेलको ७० औं मिनेटमा सलाहले गोल गर्दै लिभरपुललाई ३-२ को जित दिलाए । जितसँगै लिभरपुलले ३१ खेलमा ५० अंक जोडेको छ ।
लिभरपुल छैटौं स्थानमा उक्लिएको छ । फरेस्ट २७ अंक जोडेर १९ औं स्थानमा रहेको छ । प्रिमियर लिग अन्तर्गत नै लेस्टर सिटीले उल्भ्सलाई २-१ ले हराएको छ ।
फुलहमले लिड्सलाई २-१ ले हराउँदा ब्रेन्टफोर्ड र एस्टन भिल्लाले १-१ गोलको बराबरी खेलेका छन् । यस्तै एभर्टन र क्रिस्टल प्यालेसले गोलरहित बराबरी खेलेका छन् ।
