भक्तराज आचार्य राष्ट्रिय संगीत सम्मान दीप श्रेष्ठ र शक्ति वल्लभलाई
-आस्था न्यूज
वैशाख १४, २०८० काठमाडौं ।
भक्तराज आचार्य राष्ट्रिय संगीत सम्मान-२०७९’ घोषणा गरिएको छ । भक्तराज आचार्य संगीत प्रतिष्ठान र सिटी एक्सप्रेस मनि ट्रान्सफरको संयुक्त आयोजनामा हरेक वर्ष प्रदान गरिँदै आएको ‘भक्तराज आचार्य राष्ट्रिय संगीत सम्मान-२०७९’ घोषणा गरिएको हो ।
यो वर्ष गायनतर्फ गायक दीप श्रेष्ठ र संगीततर्फ संगीतकार शक्ति वल्लभलाई ‘भक्तराज आचार्य राष्ट्रिय संगीत सम्मान-२०७९’ प्रदान गरिने भक्तराज आचार्यका छोरासमेत रहेका स्वरुपराज आचार्यले जानकारी दिए । यसको पुरस्कार राशी जनही ५० हजार रुपैयाँ रहेको छ ।
‘सुशीला आचार्य सु-स्वास्थ्य कामना सम्मान’ युवा तबलाबादक भिपी सिंहलाई प्रदान गरिने पनि उनले जानकारी दिए । ‘सुशीला आचार्य सु-स्वास्थ्य कामना सम्मान’ गत वर्षदेखि कमजोर आर्थिक अवस्था भएका तथा औषधि उपचार गर्नबाट बञ्चित भएका संगीतकर्मीलाई दिन सुरु गरिएको हो ।
यसको पुरस्कार राशी २५ हजार रुपैयाँ रहेको छ । “नेपाली गीतरसंगीत क्षेत्रलाई थप माथि उकास्न केही योगदान होस् र यस क्षेत्रमा लामो समयदेखि अनवरत रूपमा काम गरिरहेका संगीतकर्मीलाई थप काम गर्ने प्रेरणा मिलोस् भनेर हामी हरेक वर्ष यो सम्मान गर्दै आइरहेका छौँ,” आचार्यले भने ।
