गुजरात लगातार दोस्रो पटक इन्डियन प्रिमियर लिगको फाइनलमा प्रवेश
-आस्था न्यूज
जेठ १३, २०८० काठमाडौं ।
साविक विजेता गुजरात टाइटन्स लगातार दोस्रो पटक इन्डियन प्रिमियर लिगको फाइनलमा प्रवेश गरेको छ । टोलीले क्वालिफायर-२ मा मुम्बई इन्डियन्सलाई ६२ रनले पराजित गरेको हो ।
यस जितका नायक शुभमन गिल (६० बलमा १२९ रन) र मोहित शर्मा (१० रनमा ५ विकेट) थिए । गिलले सिजनको तेस्रो शतक प्रहार गरे । उनी प्लेअफमा शतक बनाउने सबैभन्दा कान्छो ब्याट्सम्यान बने भने गुजरात लगातार दुई सिजन फाइनलमा पुग्ने तेस्रो आईपीएल टोली बनेको छ।
अहमदाबादको पीएम नरेन्द्र मोदी स्टेडियममा शुक्रबार राति भएको खेलमा मुम्बईले टस जितेर फिल्डिङ रोजेको हो । पहिले ब्याटिङ गरेको गुजरातले २० ओभरमा २ विकेट गुमाएर २३३ रन बनाएको थियो । जवाफमा मुम्बई १८.२ ओभरमा १७१ रनमा अलआउट भयो।
गुजरातको टोलीले अब मे २८ मा त्यही मैदानमा एमएस धोनीको चेन्नईसँग फाइनल खेल खेल्नेछ, यदि पाण्ड्याले धोनीलाई हराउन सफल भए भने जीटी लगातार दोस्रो उपाधि जित्ने आईपीएल इतिहासमा तेस्रो टोली बन्नेछ।
