जिम्बाबेमा हुने विश्वकप छनोटको अभ्यास खेल खेल्न सन्दीप आज दक्षिण अफ्रिका जाने
-आस्था न्यूज
जेठ २२, २०८० काठमाडौं ।
नेपाली क्रिकेट टोलीका सदस्य सन्दीप लामिछाने आज दक्षिण अफ्रिका जाने भएका छन्। अदालतमा विचाराधीन रहेको आफूविरुद्धको बलात्कार मुद्दाको पेसीका कारण सन्दीप सुरुमा राष्ट्रिय क्रिकेट टिमसँगै दक्षिय अफ्रिका गएका थिएनन्।
काठमाडौं जिल्ला अदालतले सन्दीपको मुद्दाको साधारण पेसी असार २९ गतेलाई तोकेको छ। मुद्दाको सुनुवाइ हुने पेसी त्यसपछि मात्रै तोकिने छ।
अन्तिम सुनुवाइको क्रममा रहेको मुद्दाको पेसी सरेसँगै सन्दीप सोमबार दक्षिण अफ्रिका जाने उनका कानुन व्यवसायी मुरारी सापकोटाले जानकारी दिए।
नेपालले दक्षिण अफ्रिमा अभ्यास गर्दै जिम्बाबेमा हुने विश्वकप छनोट खेल्नका लागि जाने छ। जिम्बाबेमा हुने खेलमा छनोट हुन सकेमा नेपालले एकदिवसीय विश्वकप खेल्ने छ।
नेपालले ८ जुनमा स्कटल्यान्डसँग दक्षिण अफ्रिकामा वार्मअप खेल खेल्नेछ। त्यसपछि नेपाली टोली जिम्बाबे जानेछ। जिम्बाबेमा विश्वकप छनोट खेल्नुअघि नेपालले १३ जुनमा युएई र १५ जुनमा ओमानसँग वार्मअप खेल खेल्नेछ।
