विक्रम बिसीको ‘अछाम जिल्ला तेरा मेरा’ गितको भिडियो सार्वजनिक
-आस्था न्यूज
जेठ २२, २०८० काठमाडौं ।
कलाकार विक्रम बिसीको सांगितिक कोशेली ‘अछाम जिल्ला तेरा मेरा‘ सार्वजनिक भएको छ।
बिसीकै शब्द संकलन रहेको देउडा गीतमा गायिका सुनिता बुढा क्षेत्रीले साथ दिएकी छन्। गीतको एरेन्ज आशिष् अविरलले गरेका हुन्।
विक्रम चौहान र जुना कार्कीको मुख्य अभिनय रहेको गीतमा सुदूरपश्चिमको अछाम जिल्ला र हालको कर्णाली प्रदेशको राजधानी रहेको सुर्खेतका परिवेशको बयान गरिएको छ। आफ्नो जन्मस्थल अछाममा बितेको बाल्यकाल र सुर्खेतका हुर्किएको आफ्नो अनुभवलाई गीतमा संयोजन गर्ने प्रयास गरिएको सर्जक बिसीले बताए।
गीत मार्फत सुदूरपश्चिमको भाषा, संस्कृति र भेष भूषालाई पस्किने प्रयास गरिएको छ । त्यस्तै अछामका कतिपय ठाउँमा हालसम्म पनि गाडी नपुगेको, उकालो ओरालो, डाँडाकाँडाको चर्चा गर्दै कर्णालीको चिसापानी, तिलौडाको लेखको मनोरम दृश्यलाई अनुभूति गरेका शब्द सुन्न पाइन्छ । गीतमा पर्यटकीय स्थल रामारोशन ताललाई वैकुण्ठसँग तुलना गरिएको छ।
नछुट्ने माया लगाए पनि छुटेको भन्दै गीतमार्फत माया लागे पुतलीको भेषमा भेट्न आउन प्रेमिकालाई अपिल गरिएको छ।
