इंग्लिस प्रिमियर लिग अन्तर्गत गएराति सम्पन्न तेस्रो चरणको पहिलो खेलमा चेल्सीले लुटन टाउनलाई पराजित गरेको छ ।
रहीम स्टर्लिङको दुई गोल र निकोलस ज्याक्सनको एक गोलको मद्दतमा चेल्सीले ३-० को सहज जीत हासिल गरेको हो ।
सुरुवाती दुई खेलमा जित निकाल्न असफल चेल्सीले खेलको १७औ मिनेटमा स्टर्लिङ्गको उत्कृष्ट एकल गोलमार्फत अग्रता लिएको थियो । ६८औं मिनेटमा स्टर्लिङ्गले नै व्यक्तिगत दोस्रो गोल गर्दै अग्रता दोब्बर पारे । मालो गुस्टोको पासमा बललाई गोल पोस्टको दिशा देखाउँदै स्टर्लिङ्गले दोस्रो गोल गरेका थिए ।
७५औं मिनेटमा निकोलस ज्याक्सनले गोल गर्दै चेल्सीलाई ३–० को अग्रता दिलाएका थिए । इंग्लिस प्रिमियर लिगमा शनिबार तेस्रो चरणका थप ६ खेल हुँदैछन् ।
