एसिया कप खेल्न सन्दीप पाकिस्तान जाँदै
-आस्था न्यूज
भदौ ११, २०८० काठमाडौं ।
राष्ट्रिय क्रिकेट टिमका सदस्य सन्दीप लामिछाने आज पाकिस्तान जाने भएका छन्। आफूविरुद्धको बलात्कार मुद्दाको पेसी सरेपछि सन्दीप सोमबार पाकिस्तान जान लागेका हुन्।
नाबालिकमाथि बलात्कार गरेको अभियोगमा सन्दीपले मुद्दा खेपिरहेका छन्। आइतबार अन्तिम सुनुवाइका लागि न्यायाधीश प्रकाशकुमार पण्डितको इजलासमा पाँचौं नम्बरमा पेसी तोकिए पनि हेर्न नभ्याइने हुँदै स्थगित भएको थियो।
सुनुवाइ स्थगित भएसँगै एसिया कपका लागि उनको पाकिस्तान यात्रा तय भएको हो।
उनको मुद्दाको अर्को पेसी भदौ २१ गते तोकिएको छ। १३ गतेदेखि हुने एसिया कपमा लामिछाने नेपाली टोलीमा छन्। नेपाली टोली यसअघि नै पाकिस्तान पुगिसकेको भए पनि सन्दीप मुद्दाका कारण यतै रोकिएका थिए।
सन्दीपका कानुन व्यवसायी मुरारी सापकोटाले सन्दीपविरुद्धको मुद्दाको पेसी २१ गते तोकिएको जानकारी दिए। यससँगै सन्दीपले पाकिस्तान जाने तयारी गरिरहेको उनले बताए।
नेपालले पहिलो खेल पाकिस्तानको मुल्तान क्रिकेट मैदानमा बुधबार पाकिस्तानसँग खेल्दैछ। यस्तै, दोस्रो खेल भने भारतविरुद्ध १८ गते रहेको छ। अर्को पेसीअघि उनले यी दुवै खेल खेल्न पाउनेछन्।
नेपाल समूह चरण पार गर्दै शीर्ष चारमा उक्लिएको खण्डमा भने सन्दीप फेरि नेपाल आएर पाकिस्तान फर्किनुपर्नेछ।
