एसिया कप क्रिकेट खेल्न नेपाली क्रिकेट टोलीका स्पिनर एवं पूर्वकप्तान सन्दीप लामिछाने पाकिस्तान उडेका छन् । लामिछानेलाई सोमबार ९आज० त्रिभुवन अन्तराष्ट्रिय विमानस्थलबाट बिदाइ गरिएको छ ।
त्रिभुवन अन्तर्राष्ट्रिय विमानस्थलमाबाट राष्ट्रिय खेलकुद परिषद् (राखेप) का सदस्यसचिव टंकलाल घिसिङले बिदाइ गरेका हुन् । सन्दीप आज कतार एयरवेजको फ्लाइटमार्फत दोहा हुँदै पाकिस्तान प्रस्थान गरेका छन् ।
बलात्कार आरोप मुद्दाको पेसी यही भदौ २१ गतेलाई तोकिएपछि सन्दीप एसिया कप खेल्न पाकिस्तान गएका हुन् । उक्त मुद्दामा आइतबार पेसी तोकिए पनि ‘हेर्न नभ्याइने’मा परेको थियो ।
गत मंगलबार सन्दीपबाहेक नेपाली टिम एसिया कपका लागि पाकिस्तान गएको थियो । प्रतियोगिताको समूह ‘ए’मा रहेको नेपालले घरेलु टिम पाकिस्तान र भारतसँग खेल्नेछ । नेपाल पाकिस्तानसँग भदौ १३ र भारतसँग भदौ १८ गते खेल्नेछ ।
