मधेशमा सुशासन र सामाजिक न्याय कायम गर्न एमालेले नेतृत्व लिन्छः योगेश भट्टराई
-आस्था न्युज
असोज २३, २०८० काठमाडौं ।
नेकपा एमालेका सचिव योगेश भट्टराईले मधेश प्रदेशमा सुशासन कायम गर्न एमालेले अब भूमिका खेल्ने बताएका छन् ।
एमाले मधेश प्रदेश अधिवेशनको तयारीबारे जानकारी दिन जनकपुरधाममा आयोजित पत्रकार सम्मेलनमा उनले मधेशमा सुशासन र सामाजिक न्याय कायम गर्न मधेशको स्वाभिमान माथि उठाउनु पर्ने धारणा राखेका छन् ।
उनले मधेशको स्वाभिमान र समृद्धिका लागि एमालेको सरकार आवश्यक हुने भएकोले अब मधेश प्रदेशको मुख्यमन्त्री देखि वडा अध्यक्षसम्ममा एमाले चाहिने बताए । उनले यही अवधारणा अबको अधिवेशनमा अगाडि सार्दै काम गर्ने योजना रहेको बताए ।
सचिव भट्टराईले एमालेले स्थानीय चुनावदेखि प्रतिनिधिसभाको चुनावसम्ममा बहुमत ल्याउने उद्देश्यले ६६,२०० जना आफ्नो पार्टी सदस्यहरुलाई यस अधिवेशनमा कुनै न कुनै हिसाबले सहभागिता गराएको जनाए ।
असोज २४ (भोली) र २५ गते (पर्सी) जनकपुरधाममा हुने नेकपा एमाले मधेश प्रदेशको प्रथम अधिवेशनको उद्घाटन अध्यक्ष केपी शर्मा ओलीले गर्ने उनले जानकारी दिए ।
