गाँजा र ब्राउन सुगरसहित ६ जना पक्राउ
-आस्था न्युज
कात्तिक ४, २०८० काठमाडौं ।
प्रहरीले झापा र उदयपुरबाट लागूऔषध सहित ६ जनालाई पक्राउ गरेको छ । ब्राउन सुगर र गाँजाको कारोबारमा संलग्न उनीहरुलाई प्रहरीले पक्राउ गरेको हो ।
उदयपुरको कटारी नगरपालिका ६ देउलीकुनाबाट ३८ किलो लागूऔषध गाँजासहित दुई जनालाई प्रहरीले पक्राउ गरेको छ ।
कोशी प्रदेश प्रहरी कार्यालय विराटनगरका अनुसार पक्राउ पर्नेमा खोटाङ घर भइ हाल उदयपुर ताप्ली गाउँपालिका १ का ३२ बर्षीय गणेश बहादुर मगर र ३३ बर्षीय बीरबहादुर मगर छन् ।
इलाका प्रहरी कार्यालय कटारीबाट खटिएको प्रहरी टोलीले उनीहरुलाई पक्राउ गरेको हो ।
यस्तै, झापाको दमक नगरपालिका ५ सुकुम्बासी टोलबाट लागूऔषध ब्राउन सुगरसहित ४ जनालाई प्रहरीले पक्राउ गरेको छ ।
पक्राउ पर्नेमा सोही स्थानका २४ वर्षीय समिर गजमेर, २४ वर्षीय रोशन माझी, सोही स्थान ६ का २९ वर्षीय रोशन बुढाथोकी र इलाम चुलाचुली गाउँपालिका ४ का २३ वर्षीय सागर लिम्बु छन् ।
समिर गजमेरको घरमा ब्राउन सुगरको कारोबार भइरहेको भन्ने विशेष सूचनाको आधारमा इलाका प्रहरी कार्यालय दमकबाट खटिएको प्रहरी टोलीले उनीहरुलाई ब्राउन सुगर ३ ग्रामसहित पक्राउ गरेको हो ।
