त्रिकोणात्मक श्रृंखला : हङकङलाई हराउँदै नेपाल फाइनलमा
-आस्था न्युज
कार्तिक ०४ ,२०८० काठमाडौँ ।
हङकङमाथि ७९ रनको सहज जित हात पार्दै नेपाल यूएईसँग खेल्नु अघि नै त्रिकोणात्मक श्रृंखलाको फाइनलमा पुगेको छ ।
कुशल मल्ल र दीपेन्द्र सिंहको कीर्तिमानी साझेदारीसँगै शनिबार मुलपानी क्रिकेट मैदानमा नेपालले दिएको २१४ रनको लक्ष्य पछ्याएको हङकङले निर्धारित २० ओभरमा ८ विकेट गुमाएर १३४ रन मात्र बनाउन सक्यो ।
उसका लागि अंशुमन रथले सर्वाधिक ४५ रन बनाए । नेपालका करण केसी, सोमपाल कामी र ललित राजवंशीले समान २÷२ विकेट लिए भने दीपेद्र सिंह ऐरी र प्रतिश जिसीले एक एक विकेट लिए ।
यसअघि टस जितेर व्याटिङ रोजेको नेपालले निर्धारित २० ओभरमा ६ विकेट गुमाएर २१३ रन बनाएको थियो ।
कुशल मल्ल र दीपेन्द्रसिंह ऐरीले कीर्तिमानी १४५ रनको साझेदारी गरे ।
टी–२० आईमा पाँचौ विकेटका लागि यो नै उच्च साझेदारी हो । यसअघि न्युजिल्याण्डका मार्क च्यापम्यान र जिमी निसमले पाकिस्तानविरुद्ध पाँचौ विकेटका लागि अविजित १२१ रनको साझेदारी गरेका थिए ।
कीर्तिमानी साझेदारी गर्ने क्रममा ३० बलमा ५० रन पूरा गरेका ऐरी १९औं ओभरको अन्तिम बलमा ५७ रनमा आउट भए । ३४ बलको सामना गरेका उनले दुई छक्का र ६ चौका हानेका थिए । मल्ल भने ८ रनले शतक बनाउन चुके । शतकका लागि उनलाई ८ रन चाहिएको थियो र २ बल बाँकी पनि थियो । तर बाउन्ड्री हान्ने प्रयासमा मा उनी आउट भए । ४१ बलको सामना गरेका उनले ९ वटा छक्का र तीन चौकाको मद्दतमा ९२ रन बनाए ।
