सरकार दण्डहीनतालाई प्रयोग गरेर बाँचिरहेको अधिवक्ता ध्रुबलाल श्रेष्ठको टिप्पणी
-आस्था न्युज
मंसिर १०, २०८० काठमाडौं ।
वरिष्ठ अधिवक्ता ध्रुबलाल श्रेष्ठले वर्तमान सरकार दण्डहीनतालाई प्रयोग गरेर बाँचिरहेको टिप्पणी गरेका छन् ।
आइतबार काठमाडौंमा आयोजित ‘नागरिक आवाज’ पत्रकार सम्मेलनमा बोल्दै उनले सरकारको नेतृत्वमा रहेका नेताहरु नेता हुन लायकको नरहेको भन्दै सरकार दण्डहीनतालाई प्रयोग गरेर बाँचिरहेको बताएका हुन् ।
उनले भने, ‘यसको सुररुवात राजनीतिक क्षेत्रबाट नै हुन्छ । कसैलाई नेताहरु भन्न लायकको हामी देख्दैनौं । हामीले दाई भन्यौं, नेता भन्यौं नेतृत्व तहमा पुर्यायौं । अहिले उहाँहरु सरकारको नेतृत्वमा हुनुहुन्छ तर नेता हुन लायकको हुनुहुन्न । उहाँहरुको कुण्डली हेर्ने हो भने कुनै न कुनै मुद्दा लाग्ने अवस्था छ । तर त्यस्तो हुन्न किनकी उहाँहरुले दण्डहीनतालाई प्रयोग गरिरहनुभएको छ । सरकार दण्डहीनताबाट बाँचिरहेको छ ।’
सरकार आफैं सरकार जस्तो नरहेको र जुन प्रणालीमा सरकार चलेको छ भनिएको छ त्यो प्रणालीमा सरकार अटाउन नसकेको उनको भनाई छ ।
‘सरकार आफैं सरकार जस्तो छैन । जुन प्रणालीमा सरकार चलेको छ भनिएको छ, त्यो प्रणालीमा सरकार अटाउन नसकेको वा उसैको व्यवहारले त्यो प्रणाली लरबराउने हो भन्ने अवस्था छ’ उनले भने ।
राजनीति सबैभन्दा सर्वोत्कृष्ट नीति भएता पनि संवैधानिक निकायमा बस्ने मानिसहरुबाट आफ्नो जिम्मेवारी निर्वाह नभएको उनको भनाई छ ।
