यम बराल र विश्व नेपालीको स्वरमा ‘साथी’
-आस्था न्यूज
माघ ३, २०८० काठमाडौं ।
चर्चित गायकद्वय यम बराल र विश्व नेपालीको स्वरमा रहेको गीत ‘साथी’को भिडियो सार्वजनिक भएको छ ।
म्युजिक भिडियो काठमाडौंमा बुधबार पत्रकार सम्मेलनको आयोजना गरी सार्वजनिक गरिएको हो । किरण के उप्रेतीको शब्दलाई पुष्कर सुनुवारले संगीतबद्ध गरेका हुन् भने गीतको रेकर्ड र मिक्सिङ विप्लव अधिकारीले गरेका छन् ।
गीतको भिडियोमा सन्जीत भण्डारी र मेग सुवेदीको अभिनय छ । बाल्यकालदेखि वयस्क अवस्थाका साथीको कथालाई प्रस्तुत गरिएको छ । स्वदेश होस् या विदेश जो जहाँ भए पनि बाल्यकालदेखिको मित्रता असल हुन्छ भन्ने सन्देश भिडियोमा छ ।
कुवेर तामाङको निर्देशन रहेको भिडियोमा मेग सुवेदीको कन्सेप्ट, बुद्ध थापा एन्ड टिमको छायांकन, विवेक सुनारको सम्पादन, श्याम कुँवरको कलर, उत्सव पौडेलको स्किृप्ट, मोहन सुनुवार(नवीन)को सहायक निर्देशन, निर्मल न्यौपानेको प्रोडक्सन डिजाइन छ । सेजल एन्ड सिस्टरको प्रस्तुतिमा निर्माण भएको भिडियो सेजल एन्ड सिस्टर युट्युब च्यानलबाट सार्वजनिक गरिएको छ ।
कार्यक्रममा गायक यम बरालले गीतमा विश्व नेपालीसँग सिनियर र जुनियर पनि साथी हुन्छन् भन्ने सन्देश दिन सहकार्य गरेको बताए । गीतका शब्दले आफूलाई तानेकाले सहकार्य गर्न राजी भएको उनले खुलाए । गायक विश्वले यम बरालको गीत सुनेर हुर्किएको आफूले गुरु मान्दै सहकार्य गर्न पाउँदा खुसी लागेको बताए ।
केही चलचित्रमा समेत काम गरिसकेका अभिनेता सन्जीत भण्डारीले ‘साथी’ दर्शकका लागि फरक स्वाद हुने बताए । उनले अभिनय गरेको चलचित्रमा ’चिठ्ठी’ आगामी जेठमा रिलिज हुँदैछ ।
भिडियोका मोडल मेगले गीतले आत्मीय साथीको सम्बन्धलाई प्रस्तुत गर्ने भएकाले गीतले आम दर्शकको भावनालाई प्रतिनिधित्व गर्ने बताए । मेगले पहिलो पटक अभिनय गरेका हुन् ।
