पल्सर स्पोर्टस अवार्ड माघ २८ मा हुने
-आस्था न्यूज
माघ ५, २०८० काठमाडौं ।
एनएसजेएफ पल्सर स्पोर्ट्स अवार्डको २०औं सस्करण यही माघ २८ गते हुने भएको छ ।
विभिन्न ९ विधामा हुने अवार्ड काठमाडौंस्थित होटल याक एण्ड यतिमा हुने भएको हो ।
शुक्रबार एक कार्यक्रमकाबीच होटल याक एन्ड यति र नेपाल खेलकुद पत्रकार मञ्च (एनएसजेएफ) बीच कार्यक्रमको मुख्य आयोजनास्थल सम्बन्धी सम्झौता भएको छ ।
सम्झौता पत्रमा याक एन्ड यतिका महाप्रबन्धक मोनिका साइब्लावर र मञ्चका अध्यक्ष दुर्गानाथ सुवेदीले हस्ताक्षर गरेका छन् ।
सम्झौता अनुसार, होटल याक एन्ड यति २०औं संस्करणको पल्सर स्पोर्ट्स अवार्डको हस्पिटालिटी पार्टनर रहने भएको छ ।
विभिन्न ९ विधामा हुने अवार्ड कार्यक्रमको पिपल्स च्वाइस विधाको मनोनयनमा पर्ने खेलाडीको नाम सार्वजनिक भइसकेको छ ।
मनोनयनमा परेका खेलाडीहरुमा फुटबलका अनन्त तामाङ, करातेका विप्लवलाल श्रेष्ठ, भलिबलकी निरुता ठगुन्ना, टेबलटेनिसकी सिक्का सुवाल श्रेष्ठ र शारीरिक सुगठनकी रजनी श्रेष्ठ पिपल्स च्वाइसको प्रतिस्पर्धामा छन् ।
यस विधाको विजेता ई–सेवा भोटिङ, मञ्चका सदस्यको मत, सामाजिक सञ्जाल (एनएसजेएफ पल्सर स्पोर्टस अवार्डको आधिकारिक फेसबुक पेज र पल्सर नेपालको आधिकारिक पेजबाट गर्नुपर्ने) बाट मत र २७ खेलका प्रमुख प्रशिक्षकको मतका आधारमा हुनेछ ।
पल्सर स्पोर्ट्स अवार्ड २०७९ का लागि प्रदान गरिने अन्य विधामा १. उत्कृष्ट वर्ष पुरुष खेलाडी, २. उत्कृष्ट वर्ष महिला खेलाडी, ३. उत्कृष्ट वर्ष प्रशिक्षक, ४. उत्कृष्ट वर्ष युवा खेलाडी ५. पारा एथलिट सम्मान, ६. स्पेसल अवार्ड, ७. लाइफटाइम एचिभमेन्ट अवार्ड र ८. एसियन स्पोर्ट्स जर्नालिस्ट अवार्ड रहेको छ ।
