विराट गोल्डकप फुटबलको तयारी सुरू गरिँदै
-आस्था न्यूज
माघ ८, २०८० काठमाडौं ।
पूर्वको प्रतिष्ठित फुटबल प्रतियोगितामध्येको विराटनगरमा सञ्चालन हुने ‘विराट गोल्डकप’ को आठौं संस्करणको तयारी सुरु भएको छ ।
माघ १५ गते हुने विराट गोल्डकप ट्रष्टको अधिवेशनसँगै आठौं संस्करणको प्रतियोगिताको तयारी पनि अघि बढाइने भएको हो ।
ट्रष्टका उपाध्यक्ष किशोर शाहीले आगामी माघ १५ गतेको अधिवेशनले गोल्डकपको तयारी थाल्ने जनाए ।
२०१८ सालबाट महेन्द्र गोल्डकपको नामबाट विराटनगरमा फुटबल प्रतियोगिता हुँदै आएको थियो । गणतन्त्र स्थापनासँगै २०६७ सालमा यसको नामसहित विधान मस्यौदा गरिएको थियो ।
त्यसपछि २०६७ सालदेखि विराट गोल्डकप ट्रष्टको नाममा प्रतियोगिता सुरु हुन थालेको थियो । गत सिजनको सातौं संस्करणको नेतृत्व विराटनगर महानगरपालिकाले लिएको थियो ।
गत संस्करणमा उपाधि विजेता बनेको आयोजक विराटनगरले २० लाख १५ हजार रुपैयाँ नगद पुरस्कार पाएको थियो । उपविजेता लुका सकरले १० लाख ५१ हजार रुपैयाँ नगद पुरस्कार पाएको थियो ।
