सोमबार पनि सेयर बजारमा उच्च अङ्कको गिरावट
-आस्था न्यूज
माघ ८, २०८० काठमाडौं ।
अघिल्ला तीन कारोबार दिन पनि घटेको सेयरबजारमा सोमबार उच्च अङ्कको गिरावट आएको छ । बैंक तथा वित्तीय संस्थाको खराब दोस्रो त्रैमास रिपोर्टसँगै बजार दोहोरो अङ्कले घटेको हो ।
आइतबार २५.६३ अङ्कले घटेर बन्द भएको सेयरबजार आज थप ३१.४९ अङ्कले घटेर २०९८.६९ विन्दुमा बन्द भएको हो । अघिल्लो कारोबारको दिन कुल ७ अर्ब ६७ करोड ७७ लाख ४० हजार ५८ रुपैयाँ बराबरको कारोबार भएकोमा आज कारोबार रकम घटेर ६ अर्ब ३६ करोड ६० लाख ७० हजार तीन रुपैयाँ पुगेको छ । बजार घट्दा आज कारोबार रकममा पनि गिरावट भएको हो ।
आज सर्वाधिक कमाउने कम्पनीहरुमा अप्पर स्याङ्गे र मिडसोलु हाइड्रो कम्पनी रहे । ती कम्पनीको सेयर मूल्य ९ प्रतिशत बढीले वृद्धि भयो । सोमबार सर्वाधिक गुमाउनेमा दोर्दी, रिडि हाइड्रो, हिमालयन लघुवित्त, लिबर्टी इनर्जी, मनकामना स्मार्ट लघुवित्त र मकरखोला हाइड्रो रहे । उक्त कम्पनीहरुको सेयरमूल्य ६ प्रतिशत भन्दा बढीले घट्यो ।
