झापामा महिलाको हत्यामा संलगन युवक पक्राउ
-आस्था न्यूज
माघ १४, २०८० काठमाडौं ।
साताअघि झापाको अर्जुनधारामा भएको महिलाको हत्यामा संलग्न एक व्यक्तिलाई झापा प्रहरीले सार्वजनिक गरेको छ ।
इलाका प्रहरी कार्यालय अनारमनीमा आज पत्रकार सम्मेलनमार्फत् अभियुक्त चन्द्रप्रसाद प्रसाईंलाई प्रहरीले सार्वजनिक गर्यो ।
माघ ८ गते बिहान अर्जुनधारा–६ स्थित ब्याडमिन्टन कबर्डहल नजिक ५० वर्षीया माया कार्की पुलामी मगर मृत भेटिएकी थिइन् ।
अनुसन्धानका क्रममा बिर्तामोड–८ घर भएका ४६ वर्षीय प्रसाईंले ती महिलाको हत्या गरेको खुलेको प्रहरीको भनाइ छ । उनले प्रहरीसमक्ष हत्या गरेको स्वीकारेका छन् ।
‘अवैध शारीरिक सम्बन्ध’ का कारण उनले महिलाको हत्या गरेको प्रहरीको प्रारम्भिक अनुसन्धानबाट खुलेको जनाइएको छ ।
उनीहरुबीच विवाद भएपछि हात हालाहाल समेत भएको र त्यही क्रममा प्रसाईंले ढुंगाले पटकपटक मगरको टाउकोमा प्रहार गरेको पाइएको प्रहरीले जनाएको छ ।
प्रहारपछि महिलाको घटनास्थलमै मृत्यु भएको थियो भने शव बारीमा फ्याँकेर प्रसाईं फरार भएका थिए ।
खोजीका क्रममा प्रहरीले मगरलाई पक्राउ गरेको थियो ।
