मौसमः तराईमा बाक्लो हुस्सु ,उच्च पहाडी भूभागमा हिमपातको सम्भावना
-आस्था न्यूज
माघ १५, २०८० काठमाडौं ।
आज काठमाडौं उपत्यकासहित देशको पहाडी भू-भागमा आंशिक बदली रही बाँकी भू-भागमा मौसम मुख्यतया सफा रहेको जल तथा मौसम विज्ञान विभाग मौसम पूर्वानुमान महाशाखाले जनाएको छ ।
अहिले तराईका अधिकांश स्थानहरुमा बाक्लो हुस्सु लाग्नुका साथै शीतलहर परेको छ। झन्डै एक महिनालदेखि लाग्दै आएको बाक्लो हुस्सु र पश्चिम तराईका केही ठाउँमा परेको शीतलहरका कारण तराईको जनजीवन दैनदिन कष्टकर बन्दै गएको छ । महाशाखाले अझै केही दिन तराईमा लागेको बाक्लो हुस्सु नहट्ने जनाएको छ ।
यता देशभर चिसो बढ्ने क्रम रोकिएको छैन । उपत्यका सहित देशभर चिसो बढ्दो क्रममा छ ।
आज काठमाडौंको न्युनतम तापक्रम २ दशमलब १ डिग्रि सेल्सियस मापन भएको छ ।
महाशाखाको अनुसार आज पहाडी क्षेत्रमा भने मौसम आंशिक रुपमा बदली भएको छ । बाँकी भू-भागमा सामान्यतया मौसम सफा रहने महाशाखाले उल्लेख गरेको छ ।
उच्च पहाडी र हिमाली क्षेत्रका थोरै स्थानमा हिमपातको सम्भावना रहेपनि वर्षा हुने सम्भावना नरहेको महाशाखाले जनाएको छ । आज रातिसम्म कोशी, बागमती, गण्डकी र कर्णाली प्रदेशका केही स्थानमा हिमपातको सम्भावना रहेको छ ।
