रामेछापको माथिल्लो भेगका किसानलाई आलु रोप्न भ्याइनभ्याई
-आस्था न्यूज
माघ २१, २०८० काठमाडौं ।
रामेछापको माथिल्लो भेगका किसान यतिबेला आलु रोप्न व्यस्त छन् ।
जिल्लाको उत्तरी भेगका किसानलाई अहिले आलु रोप्नको लागि बारी तयार गर्ने, मल बोक्ने तथा आलु रोप्ने कामले भ्याइ नभ्याई छ ।
‘अहिले सबै आलु रोप्ने मेलोमा छन्, बिहानदेखि साँझसम्म सबै बारीमा हुन्छन, कसैलाई पनि बोल्ने समेत फुर्सद छैन’, दोरम्बा शैलुङ गाउँपालिका-१ डडुवा शैलुङका अगुवा किसान दावासङबु शेर्पाले भने ।
रामेछापको उत्तरी भेगका किसानको मुख्य उत्पादन नै आलु हो । रामेछापबाट वार्षिक करोडौँ रुपैंयाँको आलु निर्यात हुने गर्दछ ।
रामेछापको दोरम्बा शैलुङ गाउँपालिकाको डडुवा, गौश्वारा, दोरम्बालगायतका क्षेत्रमा आलु उत्पादन हुने गर्दछ । त्यस्तै उमाकुण्ड गाउँपालिकाको गुम्देल, कुभुकास्थली, प्रीति, गुप्तेश्वर, भुजीलगायताका क्षेत्रमा पनि आलु खेती हुने गरेको छ ।
यसैगरी गोकुलगंगा गाउँपालिकाको चचुरे, ठोसे, रस्नालु तथा बेताली, नामाडी र फर्पुको माथिल्लो भागमा समेत व्यावसायिक रूपमा आलु खेती हुने गरेको छ । सो क्षेत्रको प्रमुख नगदेबालीको रूपमा रहेको आलु लगाउन किसान व्यस्त रहेका गोकुलगंगा गाउँपालिकाका पूर्वगाउँपालिका अध्यक्ष खड्ग सुनुवार बताउँछन् ।
सुनुवार आफैँ पनि व्यावसायिक किसान हुन् । स्थानीय किसानले उत्पादन गरेको आलुको बजारीकरणको लागि समेत सहयोग गर्दै आएका सुनुवार यति बेला आफू पनि आलु रोप्न व्यस्त रहेको बताउँछन् । ‘आलु रोप्ने क्रम जारी छ, यस वर्षको आलु रोप्ने काम अब अन्तिम अन्तिम हुन लाग्यो, सुनुवारले भने ।
किसानले अहिले लगाएको आलु असार, साउन महिनामा खन्ने गर्दछन् । रामेछापमा उत्पादन भएको आलु काठमाडौंका साथै मधेसका विभिन्न बजारमा बिक्री हुने गर्दछ ।
लेकमा उत्पादन भएको आलु स्वादिलो र पोसिलो हुने भएकोले बजारमा उच्च माग छ । यस वर्ष किसानले आफूले उत्पादन गरेको आलु प्रतिकेजी ५० रुपैँयामा बारीबाट नै बिक्री गरे ।
किसानले उत्पादन गरेको आलु किन्न व्यापारीहरू बारीमा नै जाने र राम्रो भाउ पाउने भएपछि आलु खेती बिस्तार हुँदै गएको छ । अझ रामेछापको शैलुङमा नै रोजिटा जातको उन्नत आलुको बिउ उत्पादन भएपछि आलुको उत्पादनमा वृद्धि भएको छ । यसले किसानलाई आलु खेतीमा थप उत्प्रेरित गरेको छ ।
