आज सोनाम ल्होसार मनाइँदै, तामाङ समुदायले गाई वर्षको स्वागत गर्दै

माघ २७,२०८०

-आस्था न्यूज

माघ २७, २०८० काठमाडौं ।
आज माघ शुक्ल प्रतिपदा, तामाङ समुदायले विविध कार्यक्रम आयोजना गरी हर्षोल्लासपूर्वक सोनाम ल्होसार मनाउँदै छन् । 
 
तामाङ समुदायको आजदेखि मुसा वर्ष पूरा गरी गाई वर्ष प्रवेश हुँदैछ । प्रत्येक वर्ष माघ शुक्ल प्रतिपदाका दिन विभिन्न कार्यक्रम गरी सोनाम ल्होसार मनाइन्छ । मुसा, गाई, बाघ, खरायो, ड्रागन, सर्प, घोडा, भेडा, बाँदर, चरा, कुकुर र सुँगुर गरी १२ वर्गमा सोनाम ल्होसारलाई विभाजन गरिएको छ ।
 
ल्होसारमा १२ वटा जीवजन्तुका नामबाट ल्हो खोर्लो अर्थात् वर्ष चक्रका आधारमा हरेक वर्ष पुरानो वर्षलाई बिदाइ र नयाँ वर्षलाई स्वागत गरी धार्मिक र सांस्कृतिक विधिअनुसार ल्होसार पर्व मनाउने गरिन्छ ।
 
तामाङ जातिको बाहुल्य रहेको बागमती प्रदेशका विभिन्न जिल्लामाका साथै लुम्बिनी प्रदेशका केही जिल्लामा यो पर्व विशेष रुपमा मनाइन्छ ।यसबाहेक तामाङ समुदायको बसोबास रहेको अन्य प्रदेशमा पनि ल्होसार मनाइन्छ । 
 
आज राजधानीको टुँडिखेल,बौद्ध, स्वयम्भू क्षेत्रमा विविध कार्यक्रम आयोजना गरी ल्होसार पर्व मनाइँदै छ ।
 
भूमिपूजा, कूलपूजा एवं दानदक्षिणा, ढोगभेट, नाचगान, विभिन्न किसिमका मिठा परिकार बनाएर खाने र शुभकामना आदानप्रदान गरी तामाङ समुदायले यो पर्व मनाउने प्रचलन छ ।
 
 समुदायका सबै जना एकै ठाउँमा भेला भई सामूहिक रुपमा मनाइने यो पर्व मुलुकका विभिन्न भूभागमा बसोबास गर्ने तामाङसहित ह्योल्मो, थकाली, जिरेल, नेस्याङ्वा, भोटे, दुरा, लेप्चा लगायतले आ–आफ्नो परम्परा अनुसार मनाउँछन् ।