क्रिकेट विश्वकप लिग-२ आजदेखि: नेपालले नामिबियासँग खेल्दै
-आस्था न्यूज
फागुन ३, २०८० काठमाडौं ।
आइसिसी पुरुष क्रिकेट विश्वकप लिग–२ बिहीबारदेखि कीर्तिपुरमा सुरु हुँदैछ । २४ खेलको त्रिकोणीय शृङ्खलाको पहिलो खेलमा आयोजक नेपालबाहेक नामिबिया र नेदरल्यान्ड्स सहभागी हुँदैछन् । यो प्रतियोगिताले टोलीहरूलाई एकदिवसीय विश्वकप २०२७ को छनोट चरणमा लैजानेछ ।
आठ टोलीको लिगमा क्यानडा, ओमान, स्कटल्याण्ड, युएई र अमेरिका रहेका अन्य टोलीले विश्वकप छनोटअघि १४४ खेल खेल्नेछन् । अघिल्लो विश्वकप छनोट चक्रको आधारमा टोलीहरूलाई विश्वकप लिग–२ र क्वालिफायर प्ले–अफमा स्थान दिइएको थियो ।
लिग–२ बाट शीर्ष चार टोलीहरू विश्वकप छनोटमा पुग्नेछन्, जसमा क्वालिफायर प्ले–अफमा आएका चार टोलीहरू, साथै आईसीसी एकदिवसीय रैंकिंगको आधारमा छनोट हुन नसकेका टोलीहरू समावेश हुनेछन् ।
लिग २ को पहिलो सिरिजका लागि नामिबिया र नेदरल्याण्ड्स यतिबेला काठमाडौंमा रहेका छन् । नेपालले पहिलो खेलमा विहीबार नामिबियासँग खेल्ने छ । यो खेल त्रिवि क्रिकेट मैदान कीर्तिपुरमा विहान साढे ९ बजे सुरुहुने छ । एक दिवसीय वरियता जोगाउनका लागि महत्वपूर्ण लिग–२ भएकाले यसलाई कम नआँक्ने नेपाली क्रिकेट टिमका कप्तान रोहित पौडेलले बताएका छन् । उनले सुरुदेखि नै उत्कृष्ट प्रदर्शन गर्ने बताए ।
एक दिवसीय वरियता जोगाउने अघिल्लो संस्करणमा नेपालले पछिल्ला १२ मध्य ११ खेल जित्दै अविश्वसनीय प्रदर्शन गरेको थियो ।
