पुटिनका आलोचक नाभाल्नीको अन्त्यष्टिमा पुगेका समर्थकले भने, ‘पुटिनबाट रुस छिट्टै स्वतन्त्र हुनेछ’
-आस्था न्यूज
फागुन १९, २०८० काठमाडौं ।
रुसका राष्ट्रपति भ्लादिमीर पुटनका सबैभन्दा कडा आलोचक एलेक्सी नाभाल्नीको अन्त्यष्टि गरिएको छ ।
१६ फेब्रुअरीमा जेलमै मृत्यु भएका नाभाल्नीको अन्त्यष्टि ढिला गरी शुक्रबार भएको हो । उनको अन्त्यष्टिमा उपस्थित भएर नारावाजी नगर्न मस्को प्रशासनले चेतावनी नै दिएको थियो । तर, नाभाल्नीका धेरै समर्थकहरु गिरफ्तारीमा पर्ने डरका बीचमा पनि अन्त्यष्टिका लागि सहभागी भएका थिए ।
अन्त्यष्टि समारोहमा अमेरिका, फ्रान्स, जर्मनीलगायत देशका राजदूतले पनि नवल्नीलाई श्रद्धाञ्जली दिएका छन् । यसैगरी नाभाल्नीका आमाबाबुले मस्कोको चर्चमा अन्त्येष्टि समारोहमा भाग लिए । समर्थकहरुले ‘धन्यवाद नाभाल्नी’, ‘पुटिन बिनाको रुस’, ‘रुस छिट्टै स्वतन्त्र हुनेछ’ जस्ता नारा लगाएका थिए । यस अवधिमा सयौं प्रहरी पनि तैनाथ गरिएको थियो । चर्च बाहिर उपस्थित मानिसहरू रोएर गुलाब र अन्य फूलहरू भित्र फालेका थिए ।
बीबीसीका अनुसार यस अवधिमा मस्कोका धेरै ठाउँमा मोबाइल र इन्टरनेट सेवाले राम्रोसँग काम गरिरहेको थिएन ।
न्युयोर्क टाइम्सले उक्त समारोहलाई प्रत्यक्ष देखाउने वेबसाइटलाई उद्धृत गर्दै अन्तिम विदाईको समयमा करिब २ लाख ५० हजार मानिसले यसलाई अनलाइन हेरेको बताएको छ । जबकि युट्युबमा करिब १.५ लाख मानिसले अन्तिम संस्कारको सम्पूर्ण कार्यक्रम हेरे ।
गत फेब्रुअरी १६ मा पुटिन विरोधी नेता नाभाल्नीको जेलमै मृत्यु भएको थियो । उनको मृत्युको कारण भने अहिलेसम्म खुल्न सकेको छैन । इन्डिपेन्डेन्ट रुसी अखबार नोभाया गजेटा युरोपले एक चिकित्सकलाई उद्धृत गर्दै आफ्नो रिपोर्टमा नाभाल्नीलाई अस्पताल ल्याउँदा उनको टाउको र छातीमा घाउ रहेको दाबी गरेको छ ।
रुसको सबैभन्दा खतरनाक जेल पोलर वुल्फमा नाभाल्नीको मृत्यु भएको थियो ।
