लुम्बिनीमा यही फागुन २८ देखी तय भएको शिखर सम्मेलन स्थगित
-आस्था न्यूज
फागुन २१, २०८० काठमाडौं ।
यही फागुन २८ र २९ गते लुम्बिनीमा आयोजना हुने तय भएको बालबालिका, विकास र शान्तिका लागि शिखर सम्मेलन स्थगित भएको छ ।
लुम्बिनी प्रदेश सरकारको आयोजना तथा अमेरिकी संस्था ‘लरिएट्स एण्ड लिडर्स’को व्यवस्थापनमा हुन लागेको शिखर सम्मेलन स्थगित भएको हो ।
लुम्बिनी प्रदेश सरकारका एक मन्त्रीले भने, ‘विविध कारणले शिखर सम्मेलन हुन नसक्ने भयो । अहिले यो स्थगित नै हुने भयो ।’
शिखर सम्मेलनका लागि लुम्बिनी प्रदेश सरकारले साढे ६ करोड रुपैयाँ बजेट छुट्ट्याएको छ । सम्मेलनमा सहभागी हुन विभिन्न मुलुकका राष्ट्रप्रमुख, पूर्वराष्ट्रप्रमुख, नोबेल पुरस्कार विजेताहरू सहित अति विशिष्ट पाहुना लुम्बिनी आउने भनेर प्रचार गरिएको थियो । अति विशिष्ट पाहुनाको सूचीमा भारतमा निर्वासित तिब्बतका धार्मिक गुरुस् दलाई लामासमेत आउने चर्चा चलेको थियो ।
‘लरिएट्स एण्ड लिडर्स’ नामक संस्थाको व्यवस्थापनमा यसअघि तीनपटक यस्तो खालको शिखर सम्मेलन भएको छ । सन् २०१६ मा भारतमा भएको पहिलो शिखर सम्मेलनमा दलाई लामा सहभागी भएका थिए ।
अन्तर्राष्ट्रिय गैरसरकारी संस्थाको नाममा करोडौं खर्च गरेर शिखर सम्मेलन गर्न लागेको भन्दै नेकपा एमाले र नेकपा माओवादी केन्द्रले त्यसको औचित्यमा प्रश्न उठाउँदै आएका थिए । प्रतिनिधि सभा र लुम्बिनी प्रदेश सभाको बैठकमा नेकपा एमालेका सांसदहरुले शिखर सम्मेलनको विरोध गरेका थिए ।
