श्रम अदालतको मुकाम काठमाडौं तोकियो
-आस्था न्यूज
चैत २२, २०८० काठमाडौं ।
सरकारले श्रम अदालतको मुकाम काठमाडौंलाई तोकेको छ ।
बिहीबार बसेको मन्त्रिपरिषद बैठकले श्रम अदालतको मुकाम काठमाडौं उपत्यकामा रहने भनिएकामा त्यसको सट्टा काठमाडौं जिल्ला रहने गरी तोक्ने निर्णय गरेको सञ्चार तथा सूचना प्रविधिमन्त्री रेखा शर्माले बताइन् ।
‘श्रम अदालतको मुकाम काठमाडौं उपत्यकामा रहने भनिएकोमा त्यसको सट्टा श्रम अदालतको मुकाम काठमाडौं रहने गरी तोक्ने भन्ने निर्णय भएको छ । यसको सूचना नेपाल राजपत्रमा प्रकाशन गर्ने’, मन्त्रिपरिषदको निर्णयबारे उनले भनिन् ।
सरकारले रामराजाप्रसाद सिंह स्वास्थ्य विज्ञान प्रतिष्ठानको पूर्वाधार तयारी विकास समितिको अध्यक्षमा सप्तरी निवासी प्राध्यापक डा. पशुपति चौधरी र सदस्य पदमा सिरहा निवासी डा. वीरेन्द्रप्रसाद यादवलाई नियुक्ति गर्ने निर्णय पनि गरेको छ ।
बिपी कोइराला स्वास्थ्य विज्ञान प्रतिष्ठान सदस्य पदमा झापाका डा. ज्ञानेन्द्रमान सिंह कार्कीलाई मनोनयन गर्ने पनि मन्त्रिपरिषदको निर्णय छ ।
